Gárvedibme ådå sámedikkegávddaj

Gárvedibme ådå sámedikkegávddaj

Dát dáhpáduvvá válggabiejve rájes gitta ådå Sámedigge la vuododuvvam gålgådismáno 20. biejve 2021.

Jáhkádisá ja båddåsasj båhtusa 2021 sámedikkeválgas almoduvvi næhttabielen valgresultat.no maŋenagi mannel gå boarkkaájggemierre l vássám ragátmáno 13. biejve. 2021 kl. 21.00.

2017 válgan gávnnuj båddåsasj válggabåhtusa juo válga ijá ja jáhkádis gudi bessi Sámediggáj máhttá boahtet åvddål gasskaijá. Låhpalasj låhkåm sjaddá vihpat guhkebu ja vuordeduvvá binnemusát vahko maŋŋel válga. Sæmmi guosská aj stuorradikkeválggaj.

Válgaj maŋŋela galggá Sámedigge dåhkkidit båhtusijt ja juohket ájrrasijt Sámedikke ållestjåhkanimjådedibmáj, fáhkakomitiejajda ja ietjá komitiejajda majt Sámedigge la vuododam. Gålgådismáno 20. biejve rabáduvvá Sámedikke ådå nieljejahkásasj gávdda.

Gå válggabåhtusa ja fábmodusá Sámedikke válgganammadusás lij sajenis, galggá gárvediddje fábmoduskomitiedja tjadádit válggabåhtusijt åbbålattjat. Dát komitiedja válljiduváj maŋemus ållestjåhkanimen. Åvddål fábmodusá li dåhkkiduvvam doajmmi ådå ájrrasa båddåsattjat.

Gå ådå sámedikkeájrrasa æjvvalij gålgådismáno 20. Biejve 2021, vuododuvvá ållestjåhkanibme. Gå ájrrasa båhti ållestjåhkanimhuodnahij, de sij tjåhkkåhij ietjaska válggabijraj milta. Válggabåhtusa mierredij gånnå juohkka ájnegis galggá tjåhkkåhit. Sierrasadje gávnnu presidænntaj ja rádeájrrasijda.

Válggabijra vuostásjájras biedjá åvddån fábmodusájt. Dan maŋŋel vállji ållestjåhkanibme fábmoduskomitiejav mij galggá dåhkkidit fábmodusájt. Maŋep biejve gålgådismáno 21. biejve ållestjåhkanibme æjvvalij ájn aktij ja de dåhkkit Sámedigge válggabåhtusijt, ja dan láhkáj aj ájrrasijt. Dan maŋŋela dievastjåhkanibme álggá bargov válljit vuostatjin ållestjåhkanime jådedimev. Gå tjåhkanimjådedibme la válljiduvvam, de sij jådedij Sámedikke ållestjåhkanimev.  

Ållestjåhkanibme vállji Sámedikke presidentav gut biedjá åvddån ietjas politihkalasj tjielggidusáv ja nammat rádeájrrasijt. Presidænnta ja rádeájrrasa guodij de ållestjåhkanimájrrasin ja sijá sadjásaájrrasa váldij sijá sajev ållestjåhkanimen.