Árbediehtu-prošeakta

Árbediehtu-prošeakta

Sámediggi lea 2019 nammadan árbedieđu (árbevirolaš máhtu) bargojoavkku.

Bargojoavkku lahtut

Jođiheaddji: Anne-May Olli, RiddoDuottarMusea
Nubbinjođiheaddji: Harrieth Aira, Árran.
Muđui joavkkus:
Kjellaug Isaksen, Davvi álbmogiid guovddáš
Solveig Joks Sámi allaskuvla
Svanhild Andersen, Mearrasiida

Mihttu lea ahte árbediehtu máhttovuogádahkan deattuhuvvo buohtalaga eará máhtuin. Sámediggi lea okta máŋgga aktevrras geain lea ovddasvástádus árbedieđus, ja erenoamaš ovddasvástádus sámi eiseváldin. 

Bargojoavkku ásaheapmi lea čuovvoleapmi ovddeš árbediehtobarggus, mii čájehii ahte lea dárbu gulahallamii ásahusaid gaskkas geain lea árbediehtu sin bargosuorggis.

Bargojoavku galgá geiget sin raportta Sámediggeráđđái njukčamánu 19. beaivvi 2021.

Bargojoavkku mandáhtta

Árbedieđu bargojoavku galgá čielggadit árvalusaid boahtteáiggi árbedieđu hálddašeamis. Bargojoavku galgá earret eará árvalit árbedieđu baohtteáiggi organiserema ja aktevrraid rolla ja ovddasvástádusa. Bargojoavku galgá maiddái árvalit boahtteáiggi hálddašeami vejolaš ruhtadanortnega. Biddjo vuođđun ahte bargojoavkkus lea gulahallan árbedieđu áššeguovdilis aktevrraiguin. Sámedikki 2016 čilgehus lea vuođđun joavkku bargui.

Loga Sámediggeráđi čilgehusa árbedieđu birra (PDF, 345 kB)