Váldi, ovddasvástádus ja rollat alit oahpus ja dutkamis

Váldi, ovddasvástádus ja rollat alit oahpus ja dutkamis

Sámedikki váldddis alit oahpus ja dutkamis lea mearkkašupmi dasa mo dát suorgi vuhtiiváldá sámi servodaga dárbbuid máhtu ovdánahttimis.

Sámediggi bargá danne dan ala ahte lágaiguin ja láhkaásahusaiguin ja konsultašuvnnaiguin stáhta eiseválddiiguin nannet Sámedikki duohta válddi suorggis.

Sámediggi lea dássážii konsulteren ja boahtán ovttaoaivilii Máhttodepartemeanttain sámi sisdoalu birra buot oahpaheaddjioahpuin ja dearvvašvuođa- ja sosiálafágaoahpuin.

Sámediggi nammada guokte stivralahtu ja ovtta várrelahtu Sámi allaskuvlla stivrii. Sámediggi lea nammadan Mette Anti Gaup ja Idar Peder Kintel Sámi allaskuvlla stivrii 2019-2022 áigodahkii. Várrelahttu lea Kajsa Kemi Gjerpe.

Loga eambbo Sámi allaskuvlla stivrra birra

Sámediggi lea maid gáibidan oažžut nammadanválddi Davvi universitehta ja UiT Norgga árktalaš universitehta stivrraide danne go dán guovtti ásahusas lea sámi alit oahppu ja dutkan mielde sin porteføljain. Máhttodepartemeanta attii nammaduvvon lávdegoddái bargun evttohit ođđa lága universitehtaid ja allaskuvllaid birra, ja árvvoštallat gažaldaga lassi válddi birra Sámediggái. NOU 2020:3 Ny lov om universiteter og høgskoler, geigejuvvui guovvamánu 13. b. Lávdegoddi lea evttohan váldit eret nammadanválddi mii Sámedikkis dál lea, nu ahte Sámediggi massášii dan válddi maid dálá universitehta- ja allaskuvlaláhka addá. NOU 2020:3 lea sáddejuvvon dábálaš gulaskuddamii, mas áigemearri lea miessemánu 22. b.