Duodji

Duodji

Duodji gullá sámi kulturárbái ja lea sámiid árbevirolaš giehtaduodjemáhttu. Duodji lea sihke kultuvra ja ealáhus, ja lea maiddái dehálaš identitehtaduddjomii sámi servodagain.

Sámedikkis lea bajimus mihttomearrin ovddidit duoji boahtteáigásaš ja geasuheaddji ealáhussan. Iežas buvttaduvvon duoji eanet vuovdin stuorát márkaniidda lea Sámedikki áŋgiruššama guovddážis. Dat mearkkaša ahte duodjeealáhus nagoda iežas heivehit ealáhusa rievdamiidda ja hástalusaide, ja ahte ealáhusa fitnolašvuohta, dienas ja gánnáhahttivuohta lassána.

Duoji ealáhusšiehtadus, maid duodjeorganisašuvnnat Sámiid duodji ja Duojáriid Ealáhussearvi šiehtadallet jahkásaččat Sámedikkiin, lea Sámedikki deháleamos gaskaoapmi dasa ahte ovddidit duoji. Ealáhusšiehtadusa ulbmil lea ovddidit dakkár ealáhusvuđot duoji mas iežas buvttaduvvon duojis lea buoret gánnáhahttivuohta ja eanet vuovdin. Ealáhusšiehtadusas leat earret eará mielde doaibmadoarjagat duojáriidda, investeren- ja ovddidandoarjagat, álggahandoarjagat, čálgoortnegat, vuovdinovddideaddji doaimmat ja doarjagat organisašuvnnaide. Dasa lassi leat ealáhusšiehtadusas dakkár doaibmabijut mat šiehtaduvvojit šiehtadallamiin nu go gealbudandoaibmabijut, gálvomearkahuksen, doaibmabijut vuovdima ja vuovdaleami várás jna.

Duodjeinstituhtta ja Boazodoalu ja duoji oahpahuskantuvra

Duodjeinstituhtta ja duoji oahpahuskantuvra ožžot jahkásaš juolludusaid Sámedikki bušeahta bokte iežaset doaimmaide.

Duodjeinstituhta (DI) váldoulbmil lea ovddidit ealáhusa árbevirolaš duoji vuođul. Áigumuššan lea lasihit barggolašvuođa sámi duodjevieruid vuođul.

Oahpahuskantuvra bargá earret eará fidnooahppiortnegiin duojis, ja galgá Sámedikki doarjagiin váldit sisa 10 fidnooahppi geat galget sáhttit váldit fágareivve duojis.

Dás leat eanet dieđut doaimmaid birra:

Duodjeinstituhtta

Boazodoalu ja duoji oahpahuskantuvra