Luohttámuš-iskkadeapmi

Luohttámuš-iskkadeapmi

Sámediggi lea ovttas fitnodagain Telemarksforskning álggahan dutkanprošeavttat: "Luohttámuš faktorin servodatovddideamis. Luohttámušdási iskan ja oktavuohta luohttámuša ja ahtanuššama gaskka sámi gielddain."

Čoahkkáigeassu

Dán ovdaprošeavttas iskojuvvo luohttámuša dássi ja mearkkašupmi sámi gielddain. Luohttámuš adnojuvvo eanet ja eanet deaŧaleappon innovašuvnna, ovddideami ja ahtanuššama dahkkin sihke almmolaš suorggis, priváhta ealáhuseallimis ja almmolaš priváhta ovttasdoaibmamis. Erenoamáš stuorra árvu lea luohttamušas fierpmádatbargui ja juohkinkultuvrii, ja erenoamážit smávva ealáhusaktevrraid gaskkas. Gávdnojit ollu iskkadeamit mat deattuhit luohttámuša, juohkinkultuvrra ja fierpmádatbarggu deaŧalašvuođa smávva lágan buvttadeddjiide ja mikrofitnodagaide. Sámi ealáhuseallimis leat ollu ovttaskas mikrofitnodagat mat adnojuvvojit deaŧalažžan báikkálaš ja regionála árvoháhkamis ja ovddideamis. Vaikko ollu eavttuin innovašuvnna, ovddideami ja ahtanuššama ektui dáid fitnodagaide leat sajis, de bissot fitnodagat unnin ja unnán gánnáhahttin. 

Váikkuhus

Sámediggi lea deaŧalaš servodatovddideaddji sámi guovllus, dan bargun lea veahkehit sámi gielddaid ahtanuššat ealáhuseallimis ja oažžut olmmošlogu laskat. Almmolaš ealáhusapparáhtas váilu dattetge máhttu ja dihtomielalašvuohta luohttámuša dásis ja árvvus, mii sáhttá hehttet innovašuvnnaid ja synenergiijaid. Prošeakta áigu váikkuhit dán čoavdima. Prošeavtta vuolggabeaktu lea ahte almmolaš regionála ja báikkálaš ealáhusapparáhta, vuosttažettiin Sámediggi ja gielddat, muhto maiddái omd. innovašuvdna Norga ja Sápmi Ealáhussiida AS, sáhtášedje buorebut ovddidit ja nannet sin rolla regionála ja báikkálaš servodatovddideaddjin sámi guovlluin, ja dieinna lágii buoridit sámi ealáhusaktevrraid ovddidan- ja dienasvejolašvuođaid. Lassánan máhttu luohttámušdási birra dahká hui deaŧalaš vuođu viidáset strategalaš bargui sámi ealáhusaktevrraid buorebut birgejumi ja ahtanuššama ektui. 

Sámediggi lea ožžon doarjaga RFF:s dán prošektii.