Máŋggalágan ealáhusdoaibma

Máŋggalágan ealáhusdoaibma

Sámediggái lea dehálaš sihkkarastit eallinfámolaš báikegottiid gos sámi giella, kultuvra ja ealáhusat addet šaddanvejolašvuođaid, ja gos ulbmil lea máhcahit dan soju ahte eanet ja eanet guovlluin lea eretfárren, erenoamážit nuoraid ja nissoniid gaskkas.

Dán ortnega mihttun lea bisuhit ja ovddidit máŋggabealat ealáhuseallima, mii vuolggaha geasuheaddji ja eallinfámolaš báikegottiid.

Ovdamearkan dakkár surggiide mat gullet máŋggabealat ealáhuseallimii, leat huksehusat/rusttegat ja bálvalusealáhusat. Sámi biepmu viidásat ráhkadeapmi ja vásáhusat biepmu ja sámi kultuvrra oktavuođas, loktejuvvojit ovdamearkan dehálaš boahttevaš ovddidansuorgin. Dábálaš mátkeealáhus oažžu doarjaga máŋggabealat ealáhuseallima ortnega bokte, muhto sámi mátkeealáhusas lea sierra ortnet.

Máŋggabealat ealáhuseallimis ii earuhuvvo das lea go doaimmas sámi sisdoallu vai ii. Dát ealáhusat leat mielde diversifiseremin ja nannemin báikkálaš ealáhuseallima, ja dain lea dehálaš rolla das ahte duddjot geasuheaddji báikegottiid.

Sámediggi áigu, doarjagiid bokte, erenoamážit deattuhit strategiijaid mat nannejit guovllu geasuheaddjivuođa ássan- ja bargoguovlun, gos nuorat ja nissonat leat erenoamáš dehálaš ulbmiljoavku.

Sámediggi háliida viidáseappot nannet ovttasbarggu boahttevaš SED-guovllu lágideaddjigielddaiguin. Dán oktavuođas deattuhuvvo dat maid Sámediggi ja gielddat sáhttet dahkat ovttas ealáhusovddidemiin ja nannemiin guovllu geasuheaddjivuođa ássan- ja bargoguovlun.