Saemien sijjienommh

Saemien sijjienommh

Saemien sijjienommh leah vihkeles bielie saemien kultuvreaerpeste, jïh vihkeles bielie laanten kultuvreaerpeste.

Båarasåbpoe saemien sijjienommh leah immaterijelle kultuvremojhtesh. Saemien sijjienommh våajnoes darjodh kaarhtine, registerinie jïh tsïegline lea dan åvteste joekoen vihkele, dovne hijven kultuvrevaarjelimmien gaavhtan, vuesiehtidh saemieh desnie hööllestamme jïh saemien gïelem våajnoes darjodh, jïh gellien aejkien aaj siebriedahken jearsoevoeten gaavhtan. Tsïeglesjimmie saemien sijjienommijste tjïelkeste gubpede almetjh båetieh, vuesehte saemieh sæjjan govlesuvvieh, sijjienommh kultuvremojhtesinie vaarjele jïh åssjaldahkide stuvrie saemien histovrijasse mij leah sæjjan ektiedamme.

Daaroedehtemepolitihken gaavhtan saemien sijjienommh nöörjen gïelese jarkoesti. Illedahke sjïdti nöörjen sijjienommh mah eah leah vïedteldihkie voenges åtnose jallh aerpievuakan. Saemien sijjienommh leah tjarke vïedteldihkie almetji jïjtsh identiteetese, jïh saemien symbovline vååjnoeh.

Dan åvteste vihkeles saemien sijjienommh tjöönghkedh, registreradidh jïh jååhkesjidh gaajhkine dajvine gusnie saemien sijjienommh åtnasuvvieh jïh leah åtnasovveme. Saemiedigkien sijjienommedïenesje saemien sijjienommh reerie  sijjienommelaaken mietie, jïh raereste guktie saemien sijjienommh tjaalasuvvieh. Saemiedigkien sijjienommedïenesje maahta aaj nommeaamhtesigujmie nïerhkedh jïh tjaelemen jïh åtnoen bïjre raeriestidh saemien sijjienommi bïjre. Saemiedigkien lea dåarjoeöörnege juktie saemien sijjienommh sïjse tjöönghkedh, sijjien nuelesne gïeleprosjekth.

Gaajhkh sijjienommh Nöörjesne nedtesæjrose Norgeskart bïejesuvvieh, gusnie maahta vuejnedh mah nommh mah jååhkesjimmiem utnieh byögkeles åtnose.

Statens kartverk