Giellateknologiija

Giellateknologiija

Sámediggeráđđi ovttasbargá iešguđet dutkan- ja ovddidanaktevrraiguin buoridandihte giellateknologalaš fálaldaga sámi gielaid siskkobealde.

Sámi gielat dárbbašit giellageavaheddjiid, ja aktiivvalaš giellageavaheaddjit dárbbašit ođđaáigásaš veahkkeneavvuid dihtora, neahta ja mobiila rusttegiid geavaheapmái. 

Divvun-prošeakta ja hállansyntesa leat goappašagat dehálaš giellaprošeavttat mat iežaset áiggis ásahuvvo Sámedikki namas, muhto mat dál leat sirdon UiT Norgga Árktalaš universitehtii. Sámediggi ovttasbargá ođđa prošeavttaiguin ja prošeavttaiguin mat juo gávdnojit, lasihandihte teknologalaš giellareaidduid logu ja kvalitehta. 

Digitála giellareaiddut

Sihke Giellatekno ja Divvun.no leat ráhkadan olu ávkkálaš giellareaidduid sámegielaide.

Gávnnat sihke ávkkálaš giellareaiddut sámegielaide ja maiddái sámegiel neahttasátnegirjjiid.

Dáppe gávnnat maid sámi boallobevddiid:

Boallobeavddit mobiilatelefovnnaide

Boallobeavddit dihtoriidde

Sámegiel riektačállinprográmmat:

Divvun siidduin gávnnat sámegiel riektačállinprográmmaid dihtorii, iešguđege čállinprográmmaide ja systemavuogádagaide.

Eaiggátvuođašiehtadus

Sámedikki direktevra Rune Fjellheim ja UiT Norgga arktalaš universitehta direktevra Jørgen Fossland vuolláičáliiga juovlamánu 12. beaivvi 2019 Sámedikki ja UiT Norgga arktalaš universitehta gaskasaš eaiggátvuođašiehtadusa ja dahkkivuoigatvuođa sámi giellateknologiijai.

– Sámedikki ja sámi álbmoga bealis lean hui ilus go dákkár šiehtadus dál lea sajis. Dat sihkarastá ahte sámi álbmogis ain lea eaiggátvuohta gáldokodii maŋŋel go UiT Norgga arktalaš universitehta válddii badjelasas sámi giellateknologiijabarggu 2011:s. Lea hui rámis dainna maid mii leat olahan dán suorggis, dan rájes go Sámediggi álggahii barggu árrat 2000-logus, unnán resurssaiguin ja olu ovddasmannibargguin. Ain lea olu mii galgá dahkkot ovdal maiddái sámegielain leat dievaslaš giellateknologalaš čovdosat. Illudan ain buori ovttasbargui, dajai Sámedikki direktevra Rune Fjellheim vuolláičállima oktavuođas.

Loga UiT Norgga arktalaš universitehta ja Sámedikki gaskasaš eaiggátvuođašiehtadusa (PDF, 2 MB)