Byjjesfaamoe, dïedte jïh råållah jollebe ööhpehtimmien jïh dotkemen sisnjeli

Byjjesfaamoe, dïedte jïh råållah jollebe ööhpehtimmien jïh dotkemen sisnjeli

Saemiedigkien byjjesfaamoe jollebe ööhpehtimmien jïh dotkemen sisnjeli baajnehte guktie daate suerkie daajroe-evtiedimmiem gorrede maam saemien siebriedahke daarpesje.

Saemiedigkie dan åvteste barkeminie Saemiedigkien tjïelke byjjesfaamoem suerkien sisnjelen nænnoestidh laaki jïh mieriedimmiej tjïrrh, jïh rååresjimmiej tjïrrh staateles åejvieladtjigujmie.

Daan raajan Saemiedigkie rååresjamme jïh seamadamme Maahtoedepartemeentine saemien sisvegen bïjre gaajhkine lohkehtæjjaööhpehtimmine jïh healsoe- jïh sosijaalefaage-ööhpehtimmine.

Saemiedigkie göökte ståvroelïhtsegh jïh aktem sæjjasadtjem nammohte Saemien jïlleskuvlen ståvrose. Saemiedigkie lea Mette Anti Gaupem jïh Idar Peder Kintelem nammoehtamme Saemien jïlleskuvlen ståvrose boelhkese 2019-2022. Sæjjasadtje lea Kajsa Kemi Gjerpe.

Lohkh vielie Saemien jïlleskuvlen ståvroen bïjre

Saemiedigkie aaj krïeveme nammoehtimmiefaamoem åadtjodh Noerhte universiteeten jïh UiT Nöörjen arktiske universiteeten ståvrojde, juktie daah institusjovnh jollebe ööhpehtimmiem jïh dotkemem sijjen dïenesjefaalenassesne utnieh.

Maahtoedepartemeente baaji moenehtsem, mij edtji raeriestimmine båetedh orre laakese universiteeti jïh jïlleskuvli bïjre, gyhtjelassem vijriesåbpoe byjjesfaamoen bïjre Saemiedægkan vuarjasjidh: NOU 2020:3 Orre laake universiteeti jïh jïlleskuvli bïjre, bööti goevten 13.b. Moenehtse lea raeriestamme Saemiedigkien daan-beajjetje nammoehtimmiefaamoem båarhte vaeltedh, guktie Saemiedigkie dam faamoem dassa maam daan-beajjetje universiteete- jïh jïlleskuvlelaake vadta. NOU 2020:3 lea sïejhme govlehtæmman seedtesovveme govlehtimmiemierine suehpeden 22.b. 2020.