Ööhpehtimmie- jïh dotkemedaerpiesvoete

Ööhpehtimmie- jïh dotkemedaerpiesvoete

Saemiedigkie barka ihke faalenasse jïh darjomh jollebe ööhpehtimmien jïh dotkemen sisnjeli, leah maahtoe- jïh daajroedaerpiesvoeten mietie saemien siebriedahkesne.

Ööhpehtimmie:

Saemiedigkien leah soptsestimmieh ööhpehtimmieinstitusjovnigujmie faalenassi bïjre jollebe ööhpehtimmien sisnjelen. Saemien skïemtjesåjhtereööhpehtimmie mij tseegkesåvva 2021 Saemien jïlleskuvleste jïh UiT Nöörjen arktiske universiteeteste, lea illedahke soptsestimmijste sjyöhtehke ööhpehtimmieinstitusjovnigujmie jïh Maahtoedepartemeentine.

Saemiedigkie lea vïhtesjæjja dennie nasjonaale iktedimmie-areenesne UHR-Saemien mij lea areena dejtie lïhtsegeinstitusjovnide mah saemien jollebe ööhpehtimmiem faalehtieh. UHR-saemien tseegkesovvi rååresjimmiej mænngan Maahtoedepartemeentine, jïh lea ektievoete Universiteete- jïh jïlleskuvleraeresne (UHR). UHR lea tjaelemesijjie UHR-saemien-dåahkan.

Saemiedigkie aaj vïhtesjæjja UHR-lohkehtæjjaööhpehtimmesne mij laavenjassine åtna iktedidh jïh kvaliteetem nænnoestidh ööhpehtimmesne jïh dotkemisnie nöörjen lohkehtæjjaööhpehtimmesne. 

Lohkehtæjjaööhpehtimmien jïh profesjovneevtiedimmien nasjonaale forume lea tseegkesovveme juktie guhkiebasse barkedh strategijine Lohkehtæjjaööhpehtimmie 2025. Saemiedigkie lea vïhtesjæjja forumisnie.  

Dotkeme:  

Gaajhki siebriedahkesuerkiej sisnjeli dotkeme fååtese mij maahta bieline årrodh daajroevåaroemistie dejtie politihkeles sjæjsjalimmide mah leah saemien siebriedahki bïjre.

Saemiedigkiebïevnesisnie jollebe ööhpehtimmien jïh dotkemen bïjre jaepeste 2016, lea ovmessie suerkide tjuvtjiedamme gusnie Saemiedigkie veanhta dotkemedaerpiesvoete lea stïeresne.

Saemiedigkie lea vïhtesjæjja saemien dotkemen programmeståvrosne (SAMISK III); Nöörjen dotkemeraeresne, NFR. Programmen bijjemes ulmie lea saemien dotkemem nænnoestidh, dovne kvantiteeten jïh vitenskapeles kvaliteeten bïjre.

Lohkh vielie Saemien dotkemen bïjre Nöörjen dotkemeraeresne daesnie.

Saemiedigkie lea Nöörjen dotkemeraerine rååresjamme lïhtsegi bïjre dotkemeraerien porteføljeståvrojne jïh gåabph programme saemien dotkemasse edtja bïejesovvedh porteføljeståvrojde. Sïemesvoete sjïdti daej lïhtsegi bïjre porteføljeståvrojne; Camilla Brattland, Uit Nöörjen arktiske universiteete, porteføljeståvrosne Klijma jïh polaare, Ellen Inga Turi, Saemien jïlleskuvle, porteføljeståvrosne Tryjjesvoete, kultuvre jïh siebriedahke jïh Torjer A. Olsen, UiT Nöörjen arktiske universiteete, Ööhpehtimmien jïh maahtoen porteføljeståvrosne.

Lissine sïemes sjïdtin programmeståvroe dotkemeprogrammese SAMISK III stuvremedåehkine jåarhka NDR:n ståvroen nuelesne. Edtja daam öörnegem orresistie vuarjasjidh gosse programmeståvroen nammoehtimmieboelhke nåhka 31.12.21.

Nammoehtimmie dorjesovveme Saemiedigkien lïhtsegijstie  foenteståvrojne regijonaale dotkemeraeride Trööndelagesne jïh Nordlaantesne.

Nordlaanten foenteståvrosne Astrid Dankertsen ståvroelïhtsege boelhken 2020-2024. Lohkh vielie PDF Nordlaanten bïjre daesnie.

Trööndelagen foenteståvrosne Birgitta Fossum lea ståvroelïhtsege jïh Sigbjørn Dunfjeld sæjjasadtje boelhken 2020-2023. Lohkh vielie RDF Trööndelagen bïjre daesnie