Sámi valáštallan

Sámi valáštallan

Sámediggái lea deaŧalaš ahte leat valáštallandoaimmat main lea sámi gullevašvuohta, sámi duogáš ja sámi giella mat leat mielde lunddolaš vuogi mielde, ja Sámediggái lea danne deaŧalaš ahte láhččojuvvojit valáštallandoaibmabijut sihke báikkálaččat, regionála dásis ja riikkaidgaskasaččat. Sámediggái lea maiddái deaŧalaš ahte valáštallan ja fysalaš aktivitehta gozihuvvojit álbmotdearvvašvuođa perspektiivvas. 

Gilvovaláštallamis ja valáštallamis lea guovddáš sadji servodagas. Historjjálaččat lea fysalaš aktivitehta leamaš lunddolaš oassi sámi kultuvrras. Dađistaga go dárbbut leat rievdan, de lea ollu aktivitehtain rievdan hápmi ja sisdoallu, ja leat dál vuođđun valáštallamii ja aktivitehtaide sihke alla valáštallan dásis ja lihkadandásis. 

Sámedikki ekonomalaš váikkuhangaskaomiid valáštallama várás mihttomearrin leat juohkelágan valáštallandoaimmat. Oassemihttomearrin lea viiddis ja buorre valáštallanfálaldat sámi álbmoga várás.

Sámediggi addá njuolggo doarjaga golmma organisašuvdnii mat organiserejit sámi valáštallandoaimmaid: Sámiid Valáštallanlihttu-Norga/Samenes idrettsforbund-Norge (SVL- N), Sámi Heargevuodjin-lihttu/Saami Reindeer-Race Federation (SHL) ja FA Sápmi.

Dasa lassin addá Sámediggi doarjaga sámi nuoraid searvamii sihke Arctic Winter Games (AWG) valáštallan- ja kulturoasis .

Njuolggo doarjagat valáštallamii galget váikkuhit dan ahte sámi valáštallanorganisašuvnnat sáhttet ovddidit valáštallanfálaldaga sihke govdodat- ja njunušdásis.

Loga Sametingsrådets redegjørelse om samisk idrett (PDF, 423 kB)

Kultur- valáštallanstipeanda

Sámedikkis lea maiddái kultur- ja valáštallanstipeanda kultur- og idrettsstipend, mii addojuvvo juohke nuppi jagi. Jagi 2019 rájes juhkkojuvvo juohke jagi.

Stipeanda galgá movttidahttit sámi nuoraid bargat dáidagiin, kultuvrrain ja valáštallamiin. 25000 ruvdnosaš stipeanda juhkkojuvvo. Stipeanda galgá mannat ovttaskas olbmuide goappašiin sohkabeliin, ja sii geat ožžot stipeandda galget leat gaskal 16 ja 25 jagi dan jagi goas stipeanda juhkkojuvvo.