Mánáidgárdeprošeakta Sámi mánát ođđa searvelanjain (SáMOS)

Mánáidgárdeprošeakta Sámi mánát ođđa searvelanjain (SáMOS)

Prošeakta Sámi mánát ođđa searvelanjain galgá viđa jagis rievdadahttit sámi mánáidgárdestruktuvrra sámi filosofiija ja árbedieđuid vuođul.

Dat mearkkaša dan ahte sámi mánáidgárddit galget sáhttit bargat sámi pedagogalaš málliid mielde mat vuođđuduvvojit sámi gillii, kultuvrii ja árbedieđuide mat leat heivehuvvon ođđaáigásaš sámi servodahkii.

Čoahkkimat ja seminárat galget čađahuvvot dutkiiguin ja universitehtain dovdáhan dihtii doaibmi sámi málliid sámi kultuvrra ja filosofiija, giela ja árbedieđuid vuođul.

Ovddasmanni mánáidgárddit sierra sámi guovlluin válljejuvvojit hábmet sámi mánáidgárddi boahtteáiggi. Buot mánáidgárddit ja pedagogat galget searvat juoga nu láhkai áŋgiruššamii sihke gelbbolašvuođa ovddideami bokte ja sin máhtuin árjjalaččat searvat.

Sámi mánát ođđa searvelanjain galgá bargat miehtá Sámi go juo prošeakta lea mielde Sámi parlamentáralaš ráđi doaibmaplánas. Sámedikkit Ruoŧa ja Suoma bealde leat ohcamin Interreg-ruđaid vai sáhttet leat mielde prošeavttas.

Sámediggi lea prošeavtta olis almmuhan girjji Maanaj gaavhtan/Mánáj diehti/Unna olbmožiid dihte/Med tanke på barna, ja SáMOS-seahka, maid fállá nuvttá mánáidgárddiide. Loga eanet dan birra dás.

Prošeaktafakta:

Prošeaktaáigi lea vihtta jagi cuoŋománu 2018 rájes.

Prošeavtta eaiggáduššá Sámediggi.

 

Prošeaktajoavku:

Prošeaktajođiheaddji Ol-Johán Sikku
Anna Kristine Skum Hætta ja Anne Jannok Eira, prošeaktamielbargit
Gudrun Kuhmunen ja Anne Ingebjørg Eriksen, fágalaš áššedovdit

Leatgo dus gažaldagat?

Ol Johan Sikku
Prošeaktajođiheaddji SáMOS
E-poasta
Telefovdna 78 48 42 04