Dearvvašvuohta

Dearvvašvuohta

Sámediggi oaidná ahte lea dárbbašlaš oažžut vuđolaš ja systemáhtalaš gova movt sámi pasieanttaid dárbbut oažžut heivehuvvon fálaldaga vuhtiiváldojuvvo.

Sámi pasieanttain miehtá riika lea riekti oažžut dearvvašvuođafálaldaga mii lea gielalaččat ja kultuvrralaččat heivehuvvon, muhto sii deaivvadit dávjá dearvvašvuođabálvalusain mas lea unnán máhttu sámi giela ja kultuvrra birra, ja gos lea unnán vejolašvuohta atnit iežas giela. Dát dagaha bálvalussii heajos kvalitehta ja lea stuora boasttudikšun- várra.

Dan dihte oaidná Sámediggi dárbbu nannet dutkama mii dat lea mii váikkuha dearvvašvuhtii, ja dutkama bálvalusfálaldagas sámi pasieanttaide. Muđui lea dárbu lasihit gelbbolašvuođa sámi gielas- ja kultuvrras buot dásiin dearvvašvuođabálvalusas.

Suohkaniid dearvvašvuođa ja fuolahusbálvalusas ferte leat máhttu sámi giela ja kultuvrra birra, ja dat ferte leat searvvis suohkana dearvvašvuođa - ja fuolahusplánain, ja bálvalusain. Sámediggi áigu bargat vai šaddá ollislaš áŋgiruššan primáradearvvašvuođabálvalussii sámi álbmogii.