Mïrrestalleme tjoeli gaskem

Mïrrestalleme tjoeli gaskem

Saemiedigkie sæjhta mïrrestallije saemien siebriedahken åvteste barkedh seamma reaktajgujmie, dïedtigujmie jïh nuepiejgujmie gaajhkesidie.

Våarome daan barkose lea mïrrestalleme lea gaajhki siebriedahkesuerkiej bïjre jïh dan åvteste akte sjïehtesjamme bielie mijjen barkoste.  Saemiedigkie reektestimmiem tjoelemïrrestallemen bïjre nænnoesti 2012 (PDF, 205 kB). Reektestimmie ovmessie suerkieh digkede gusnie tjoele maahta heaptojne årrodh mïrrestallemasse. Såemies suerkieh bæjjese vaeltieh guktie edtjebe barkedh juktie tjoelesïerredimmiem heerredidh. Lissine reektestimmie såemies suerkieh jarngesne åtna goh tjoeleidentiteete, vædtsoesvoete lïhke fuelhkine jïh seksuelle legninge.
Ulmie lea mïrrestalleme edtja meatan vaaltasovvedh gaajhkide politihkesuerkide Saemiedigkien barkosne

Daate sæjhta jiehtedh mijjieh aareh gaajhkine politihkeles prosessine analyseradibie mah konsekvensh politihke maahta nyjsenæjjide jïh ålmide åadtjodh. Joekoen vaenie politihke lea aalkoelisnie tjoelenøytraale. Gosse politihkem hammode jïh sjæjsjalimmieh vaalta, tjoerebe krööhkestidh nyjsenæjjah jïh ålmah joekehtslaakan jielieh, joekehts krïevenassh, sjaavnjoeh jïh daerpiesvoeth utnieh. Ihke nyjsenæjjah jïh ålmah edtjieh seammalaakan gïetesovvedh lea dan åvteste daerpies ovmessie råajvarimmiejgujmie tjoelide. Vihkeles aaj dovne nyjsenæjjaj jïh ålmaj viehkie jïh barkoe våajnoes dorjesuvvieh jïh aarvoem åadtjoeh dejnie ovmessie politihkesuerkine.

Mijjen mïrrestallemebarkosne aktem solidarihkeles dïedtem utnebe viehkiehtidh tsiehkiem aalkoealmetjidie bueriedidh mah sïerredimmiem dååjroeh sijjen tjoelen gaavhtan jeatjah lehkesne veartenisnie.

Saemiedigkieraerie sæjhta stïeresne årrodh gaskenasjonaale areenine gusnie tjoelegyhtjelassh leah teema. Mijjieh aaj sïjhtebe tjoelesïerredimmiem våajnoes darjodh mijjen sïejhme gaskenasjonaale barkosne. Daate barkoe tjuara tjïelke ulmieh mijjen mïrrestallemepolitihkese utnedh, jïh akte årganiseradamme laavenjostoe aalkoealmetjegujni gaskem tjuara våaroeminie årrodh.