2022 stáhtabušeahttaárvalus: – Heajut ekonomalaš lassáneapmi go vurdojuvvon

2022 stáhtabušeahttaárvalus: – Heajut ekonomalaš lassáneapmi go vurdojuvvon

Heaiti ráđđehus bijai odne ovdan iežas stáhtabušeahttaárvalusa boahtte jahkái. Sámediggái evttohuvvo sullii 20,5 miljovnna ruvdnosaš lassáneapmi, muhto stuora oassi dás lea juo čadnojuvvon masa galgá mannat ja lea duohta haddelasáhusa haga. – Mii vuordit ahte ođđa stuoradiggeeanetlohku dohppe dán áššin, dadjá sámediggeráđđi Henrik Olsen (NSR).

Sámediggi galgá bušeahttaevttohusa mielde hálddašit sullii 559,6 milj. ruvnno jagis 2022. Dát lea sullii 20,5 milj. ruvnnu lasáhus jagi 2021 ektui, muhto dás leat 13,3 miljovnna ruvnno čadnojuvvon juo ahte galgá mannat Saemien Sijte – lullisámi musea ja kulturguovddáža jagi 2022 viessoláiggu máksimii – (7,3 milj. ruvnno) ja Dieđ. Sd. 37 (2020–2021) Sámi giela, kultuvrra ja servodateallin – Ealli sámi báikkálašservodagaid ealáhusvuođđu nammasaš dieđáhusa čuovvuleapmái (6 milj. ruvnno). Sámedikki lasáhus maŋŋel go čanastusat leat gessojuvvon eret lea 1,3 proseantta, mii mearkkaša ahte lea 6 miljovnna ruvnno unnit go dárbbašuvvošii gokčat dárbbu.

– Mis lei áigumuš oažžut 5 proseantta lasáhusa, ja bušeahttaárvalus lea heajut go diibmá. Mii oaidnit earret eará ahte oassi dáin ruđain leat ovdalaš lohpádusat ja leat ovdagihtii čadnojuvvon, juoga mii duohtavuođas mearkkaša ahte mii eat oaččo gokčojuvvot haddelassáneami. Ráđđehus geavaha daid seamma ruđaid guovtte geardde, ja dainna eat leat beare duhtavaččat, dadjá sámediggeráđđi Henrik Olsen (NSR), geas lea bušeahttaovddasvástádus ráđis.

Sámedikkis leat vuordámušat ahte ođđa stuoradiggeeanetlohku dohppe dán áššin ja čuovvula ovdalaš lohpádusa ahte Sámediggi lea friddja ieš mearridit masa ruhta galgá geavahuvvot.

Duhtavaš sámi mánáidviesuin

Stuorámus oassi lasáhusas sámi ulbmiliidda guoská Justisdepartemeantta vuoruheapmái, gos ráđđehus árvala 5 miljovnna ruvdnosaš juolludeami ásahit sierra mánáidviessofálaldaga mii lea erenoamážit heivehuvvon sámi guovddášguovlluid mánáide.

– Midjiide lea leamaš hui dehálaš ahte ráđđehus ferte čuovvulit doaibmaplána veahkaválddálašvuođa vuostá lagas oktavuođain, dan dihte lea árvaluvvon juolludus hui illudahtti ja dehálaš vuoruheapmi. Mii leat ilus go ráđđehus dán lea čuovvulan, dadjá sámediggepresideanta Aili Keskitalo (NSR).

Nu go vurdojuvvon, de ráđđehus evttoha juolludit 60 milj. ruvnnu jahkái 2022 álggahanjuolludussan hukset oktasaš ođđavistti Sámi joatkkaskuvlii ja boazodoalloskuvlii ja Beaivváš sámi našunálateáhterii Guovdageidnui, juoga maid Sámediggi atná hui positiivvalažžan.

Sámediggepresideanta lea čielggas dan ektui ahte sámi servodaga bealis leat vuordámušat ahte álgi ráđđehus mas Bargiidbellodat lea njunnošis čuovvula dan lohpiduvvon sámi kulturloktema.

– Ii leat makkárge ágga ahte sámi kulturloktema lohpádusat galget maŋiduvvot, ja mis leat vuordámušat ahte dát lea okta dain eanemus konkrehta áššiin maid oaidnit lagamus boahtteáiggis, dadjá sámediggepresideanta Aili Keskitalo.

Jus áiggut jearahallama dahje leat gažaldagat, váldde oktavuođa:

Sámediggepresideanta Aili Keskitalo, tlf: 971 29 305
Sámediggeráđđi Henrik Olsen, tlf: 907 75 219