Addet 300 000 kruvnnu filbmalávvui gos sáhttá geahččat 360-gráda filmmaid

Addet 300 000 kruvnnu filbmalávvui gos sáhttá geahččat 360-gráda filmmaid

Hans Pieski

Sámediggeráđđi lea juolludan 300 000 kruvnnu Internašunála Sámi Filbmainstituhttii (ISFI) Guovdageainnus stuorra filbmalávu huksemii mas leat teknihkalaš rusttegat ja gos galgá sáhttit čájehit 360-gráda filmmaid.

Sámediggeráđđi Henrik Olsen.ISFI prošeavtta namma lea Árran 360° ja plána mielde almmuhuvvo prošeakta riikkaidgaskasaččat boahtte jagi mas čájehit sihke sámi ja eará guovlluid álgoálbmotfilmmaid. ISFI lea dáinna prošeavttain álggahan ovttasbarggu máŋggain álgoálbmotfilbmadahkkiin geat leat sihke Sámis, Kanadas, Aotearoas, Austrálias ja USAs eret.

Dan stuora ođđaáigásaš filbmalávvui galget biddjojuvvot virtuála reality-sonat, ja fállojuvvojit maiddái nu gohčoduvvon reality-applikašuvnnat mat galget duođabun dahkat digitála objeavttaid. Geahččis lea alddis vejolašvuohta lihkadit govas, ja maiddái válljet mot háliida geahččat filmma; maŋos guvlui, ovddas guvlui, olgeš dahje gurut guvlui dahje bajás ja vulos guvlui. Reality-applikašuvnnat geavahit maiddái dahkujierpmi nannemii ja geahčči sáhttá ieš lonuhit geahččanguovllu ja áiggi.

Prošeakta Árran 360° máksá 10 miljovnna kruvnnu ja dás lea oassin sihke árbevirolaš ja ođasmahtti gávnnadeamit. Eamiálbmogiid historjját ja ságastallamat leat dehálaš oasit dahje elemeanttat go huksejit filbmalávu ja ISFI lea dál bargame fuomášuhttit ođđa vuogi virtuála muitalusaid gaskkustemiin.

– Dát lea sihke miellagiddevaš ja ođđajurddašeaddji prošeakta. Vejolašvuohta čájehit 360-gráda filmmaid lea boahtteáigi, maiddái sámi- ja álgoálbmotfilbmadahkkiide. 360-gráda filmmain beassá duođai vásihit ahte máilbmi lea jorbbas ja maiddái geahččin vásihit leat jorbadasa lihkadeaddji guovddážis, dadjá sámediggeráđđi Henrik Olsen (NSR).

Olsen liiko dan jurdagii ahte fuomášit ođđa teknologalaš ovttasbargoprošeavttaid dahkan dihtii filbmamuitalusaid vel miellagiddevaččabun, ja go áŋgiruššet 360-gráda kámera teknologiijain.

– Dát lea ođđajurddašeapmi, ja mii illudit čájehit min historjjáid govda viiddis viŋkiliin. Várit, duoddarat, mearra, eallit ja olbmot čájehuvvojit govda viiddis viŋkilis, ja dat čájehuvvojit riikkaidgaskasaččat ođđaáigásaš filbmalávus, dadjá Olsen.

Jus leat gažaldagat dahje jus áiggut jearahallat, váldde oktavuođa sámediggeráđiin Henrik Olseniin (NSR), 907 75 219, henrik.olsen@samediggi.no