Áššemeannudeaddji

Áššemeannudeaddji

Sámedikki giellaossodagas lea rabas bistevaš virgi áššemeannudeaddjin Báikenamma- ja gielladikšunjuhkosis.

Ohcanáigemearri: 31.01.2022.

Bargosadji lea muhtun Sámedikki kánturbáikkiin gos lea guoros sadji. Álgin farggamusat.

Juhkosa ovddasvástádussuorggit

  • Sámegiel báikenammaáššiid meannudeapmi
  • Jorgaleapmi dárogiela ja sámegielaid gaskka
  • Gielladikšun
  • Giellateknologiija
  • Riikkaidgaskasaš giellaáššit

Barggut

Virggi valdobarggut:

  • Sámegiel báikenammaáššiid meannudeapmi
  • Eará giellafágalaš barggut

Virgái sáhttet maid biddjot eará barggut mat gullet Sámedikki doibmii.

Gelbbolašvuohta

Virgái gáibiduvvo sámegieloahppu allaskuvllas/universitehtas, unnimustá bachelordásis. Lea ovdamunni jus ohccis lea oahppu ja bargohárjáneapmi báikenammasuorggis. Máhttu sámegielaid gielladilis deattuhuvvo. Ohcci berre maiddái máhttit dárogiela dahje eará skandinávalaš giela, go báikenamaid áššemeannudeapmái gullá maiddái gulahallat eará ásahusaiguin mat barget báikenammaáššiiguin.

Muđui deattuhuvvo:

  • Buorit gulahallan- ja ovttasbargodáiddut
  • Buorre njálmmálaš ja čálalaš ovdanbuktindáidu
  • Dáidu bargat iešheanalaččat ja ulbmillaččat
  • Veahkkáivuohta
  • Persovnnalaš dohkálašvuohta

Árvvoštaladettiin geas lea buoremus gelbbolašvuohta, deattuhit oahpu, bargohárjáneami, persovnnalaš dohkálašvuođa ja motivašuvnna virgái.

Bálká- ja bargoeavttut

Virgi bálkáhuvvo Stáhta regulatiivva mielde virgekodas 1434 ráđeaddi dahje 1364 seniorráđđeaddi, bargoduogáža ja gelbbolašvuođa vuođul.

  • Bálkkás gessojuvvo 2 % Stáhta penšuvdnakássii
  • Buorit loatna- ja penšunortnegat Stáhta penšunkássas
  • Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 % jahkái gitta 25.000 ru rádjai, sii ožžot maiddái sierra vearrogessosa.
  • Máškidis bargoáigi ja buorit čálgoortnegat

Stáhta bargofámus galgá vejolašvuođaid mielde speadjalastojuvvot álbmoga girjáivuohta. Bargiidpolitihkalaš mihttomearrin lea olahit dássedettolaš ahke- ja sohkabealčoahkkádusa, ja dasto rekrutteret olbmuid geain lea sisafárrejeaddji duogáš, doaibmavádjet olbmuid ja geain leat váillit CV:s.
 
Sámediggi ávžžuha gelbbolaš kandidáhtaid ohcat, beroškeahttá agis, sohkabealis, nationála dahje etnalaš duogážis, doaibmavádjitvuođas dahje váillis CV:s. Sámediggi lea čáhkkilis doaibma (Searvvaheaddji Bargoeallin) ja deattuhat ovttaskas bargiid bargodiliid láhčima.
 
Virgádeapmi dáhpáhuvvá gustovaš lágaid, njuolggadusaid ja šiehtadusaid mielde.
Virggis lea 6 mánu geahččalanáigi.

Ohcan

Ohcan sáddejuvvo elektronalaččat liŋka bokte «Oza bargui», ja mielde galget biddjojuvvot:

  • Ohcanreive
  • CV – oahppu ja bargovásihusat fertejit devdojuvvot elektronalaš skovvái
  • Oahppo- ja bargoduođaštusat galget biddjojuvvot mielddusin
  • Unnimusat guokte referánssa

Almmolašlága §25 mielde sáhttá almmuhit dieđuid ohcci birra vaikko ohcci lea bivdán ahte ii biddjojuvvo ohcciidlistii.
 
Ohcanáigemearri: 31.01.2022.

Oktavuohta

Eanet dieđuid virggi birra oaččut go válddát oktavuođa:

Oza bargui

Ohcanáigemearri

Ođđajagemánu 31. b. 2022