Doarjja fitnodagaide Porsanger Treindustri AS ja Vuorji Rein AS

Doarjja fitnodagaide Porsanger Treindustri AS ja Vuorji Rein AS

Sámediggeráđđi lea juolludan 500 000 ru. doarjjan Porsanger Treindustri AS:i Leavnnjas ja 410 000 ru. doarjjan Vuorji Rein AS:i Kárášjogas.

Porsanger Treindustri AS lea jagi 2010 rájes buvttadan viessogálvvuid ja muorragálvvuid diŋgoma vuođul. Eanaš oassi buktagiin manná priváhta márkanii, ja sáddejuvvojit miehtá riikka. Fitnodat láigoha dál lanjaid Leavnnja boares meieriijavisttis. Sámedikki doarjja galgá geavahuvvot hukset sierra buvttadanvistti.

Ođđa lanjat galget heivehuvvot erenoamážit Porsanger Treindustri buvttadeapmái, mii buoridivččii fitnodaga árvoháhkama ja gánnáhahttivuođa.

– Dán lágan investeren váikkuha stuorra hutkkálašvuhtii ja fitnodatovdáneapmái. Danne vuoruhuvvojit dákkár prošeavttat min doarjjaortnegiin, dadjá sámediggeráđđi Silje Karine Muotka.

Lanjat leat hábmejuvvon iežaset vásáhusaid vuođul, ja dálá hábmen-, áibmomolsun- ja DBS-gáibádusaid vuođul. Fitnodat háliida geavahit koronadili dasa ahte investeret fitnodatovdánahttimii ja ođđa márkaniidda vai sii leat gergosat lágidit gálvvuid go pandemiija lea nohkan.

– Porsanger Treindustri lea gelddolaš fitnodat man márkanin lea olles riika. Porsáŋgu gullá SED-guvlui ja Sámediggi háliida áinnas váikkuhit dasa ahte eanet báikkálaš fitnodagat regiovnnas ovdánit. Nu mii sáhttit váikkuhit eanet báikkálaš árvoháhkamii ja eanet bargosajiide, dadjá sámediggeráđđi.

Vuorji Rein AS lea biebmogálvofitnodat Kárášjogas mii galgá viidáseappot ráhkadit bohccobierggu mii boahtá sin iežaset boazoguohtunguovllus. Sii leat ovdal ožžon álggahandoarjaga Sámedikkis, ja dál lea fitnodat ođđa muttus go sii áigot earret eará gárvvistit buvttadanlanjaid ja ovddidit buktagiid. Prošeavtta ulbmil lea buoridit báikkálaš árvoháhkama boazodoalus, mii lea okta Sámedikki vuoruhuvvon surggiin.

– Dát prošeakta lea ovddidandoaibmabidju dakkár investeremiiguin mii addá báikkálaš viidásat ráhkadeami ja sámi guovlluid borramuša stuorát gávpejoru. Dat addá eanet báikkálaš árvoháhkama, lassin dasa ahte márkanii bohte eanet buktagat válljen láhkai. Dan mii háliidit doarjut, dadjá sámediggeráđđi.

Eanet dieđuid ja jearahallama várás, váldde oktavuođa sámediggeráđiin Silje Karine Muotka (NSR), tel. 984 87 576 dahje e-poasta: silje.karine.muotka@samediggi.no