Doarjja geahččalit beatnatskálžobivddu

Doarjja geahččalit beatnatskálžobivddu

Sámediggeráđđi juolluda Davvenjárgga fitnodahkii Sarnespollen Havn AS:ii 323 000 ruvnno prošektii mas galget beatnatskálžobivddu geahččalit.

Silje Karine MuotkaBeatnatskálžu lea nálli maid leat sámi guovlluin unnán bivdán, muhto mii jearahuvvo olu asiáhta márkaniin, erenoamážit Lulli-Koreas, ja sii sisafievrridit gálvvu erenoamážit Englánddas ja Franskas.

Sarnespollen Havn AS háliida geahččalanbivdduin duođaštit ahte beatnatskálžžu bivdin sin guovllus lea sihke gánnáhahtti ja guoddevaččat vejolaš. Sávaldat lea ahte dát šattašii lassiealáhussan mii sihkkarastá dienasvuođu ja mii geasuhivččii eanet nuoraid guovllus bivdigoahtit. Dat maid váikkuha dasa ahte ávkkástallat áhperesurssas mii dán rádjái ii leat geavahuvvon. Prošeavtta olis ovttasbargá Sarnespollen Havn AS Áhpedutkaninstituhtain.

– Midjiide lea gelddolaš oaidnit prošeavtta bohtosiid, ja sávvat beatnatskálžobivdu šaddá ođđa boahtteáigásaš, gánnáhahtii ja ceavzilis ealáhus guolásteddjiide SED-guovllus, lohka sámediggeráđđi Silje Karine Muotka (NSR). 

Norggas bivdojuvvo odne eanemus Trøndelágas lulás guvlui. Romssas ja Finnmárkkus lea leamaš unnán beatnatskálžžu bivdin. Sivva dasa lea árvideames árat áiggi dutkančállosat mat geažuhedje ahte beatnatskálžžu nálli stuorru mađi lullelii Norggas boađát. Čuoččuhusat eai leat iskojuvvot ođđasit áiggis ja prošeavttas lea dan dihte okta mihttu oažžut eanet dieđuid guovllu gávdnoštumi birra.

Geahččalanprošeakta galgá bistit jagi.

323 000 ruvdnosaš juolludus addo doarjjaortnegis Doarjja vuođđoealáhusaide (mariidna ealáhusat).

Gažaldagaid ja jearahallamiid oktavuođas, váldde oktavuođa sámediggeráđiin Silje Karine Muotka (NSR), mob. +47 984 87 576, silje.karine.muotka@samediggi.no