Doarjja guolástusealáhussii buktá bargosajiid

Doarjja guolástusealáhussii buktá bargosajiid

Sámediggeráđđi lea juolludan doarjaga máŋgasii guolástusealáhusas, ja leat dáinna lágiin fárus ásaheamis bargosajiid boaittobeal báikkiide.

Sámediggi lea juolludan 337 000 ruvnno doarjjan aittoásahuvvon fitnodahkii Båro AS Láhppi suohkanis. Doarjagiin áigu ohcci oastit bivdofatnasa ja bivdosiid. Båro AS lea bivdimen riddo-, vuotna- ja áhpeguovlluin, vuosttamužžan dorskki ja reappá, muhto maiddái báldá, divssu ja sáiddi nubbinealáhussan. Fitnodaga eaiggádis, Jostein Bårdsen Rosenlundas, lea 12 jagi vásáhus guolástusealáhusas ja háliida fitnodatásahemiin guolásteami eallinláhkini.

Ráđđelahttu Silje Karine Muotka (NSR) mielas lea positiivvvalaš go guolástusealáhus addá bargosajiid Láhppi suohkanis.

– Ealáhus lea fárus nanneme ássama rittu guovlluin, ja dainna lágiin bajásdoallame ceavzilis mearrasámi servodagaid.

Sámediggeráđđi lea maiddái juolludan 400 000 ruvnno doarjjan VSK Fiskeredskaperii hukset ođđa fierbmebuvttadanvistti Várdnái Gálsa suohkanis. Otná buvttadanvistti Kokkevollen næringsparkas galgá stuoriduvvot 300 m2 sturrosaš huksehusain.

VSK Fiskeredskaper dadjá ohcamisttis ahte stuorideapmi lasiha buvttadankapasitehta ja árvohahkama ja addá maiddái eambbo bargosajiid Gálsai. Sii árvvoštallet ahte stuorideapmi  dagaha 2-3 ođđa bargosaji fitnodahkii.

Aittoálggahuvvon ovttaolbmofitnodahkii Valle Fisk AS Davvesiidda suohkanis, lea ges ožžon 331 000 ruvnno doarjaga sámediggeráđis. Valle Fisk lea vuotnaguolásteaddji ja doarjagiin áigu oastit bivdofatnasa ja bivdosiid. Fitnodateaiggáda; Frank-Arne Valle, mihttu lea vuosttažettiin alcces ásahit bargosaji, ja dasto maŋŋil ásahit vel nuppi bargosaji Davvesiidii.  

– Ásaheapmi lea dehálaš Davvesiidda suohkanii, go guollevuostáváldis doppe lea dárbu ahte eanet báikkálaš fatnasat ilbmet. Mii fas dagaha ahte varasguollehivvodat gáddái lassána. Mii leat movttegat go Sámediggi lea fárus ásaheamis bargosajiid boaittobeal báikkide. Guolástusealáhus lea guovddáš ealáhus máŋgga báikegottiin riddogáttiin, ja barggaheami ja buriid rámmaeavttuid oktavuohta sáhttá lasihit ássama dáin guovlluin, loahpaha Muotka

Jearahallama addá dahje vástida gažaldagaide sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no