Doarjja mátkeealáhusfitnodahkii Láhpis

Doarjja mátkeealáhusfitnodahkii Láhpis

Sámediggeráđđi juolluda 163 000 ruvnno doarjaga Láhpi fitnodahkii Arctic Nuvsvåg AS:i, nuppástuhttimii ja gelbbolašvuođaloktemii.

Deaddil ja stuora govva ihtáSilje Karine Muotka (NSR)Arctic Nuvsvåg AS bargá luondduturismmain Cuokcavuonas, Láhpis. Sii láigohit earret eará barttaid, fatnasiid ja gullevaš dávviriid. Arctic Nuvsvåg lea vásihan, nu go earáge mátkeealáhusfitnodagat, gáibideaddji jagi koronapandemiija geažil. Gáibideaddji jagi dihte áigot prošeavttain masa leat ohcan doarjaga, heivehit ja nuppástuhttit, ja áigot rievdadit visttiid nu ahte leat sihkkareappot njoammueastadeami dáfus.

Fitnodat oažžu dál doarjaga investeremiidda mat galget buoridit njoammueastadeami sin fálaldagain, ja mat dahket ahte sáhttet bálvalit máŋga turistajoavkku oktanaga. Doaibmabijut galget maiddái nannet fitnodaga kapasiteahta go servodat fas beassá dábáleappot dillái.

Sámediggeráđi mielas leat báikkálaš ealáhuseallimiid prošeavttat buorit, go ábuhit árvoháhkamii ja eambbo bargosajiide.

– Arctic Nuvsvåg AS lea fállan mátkeealáhusfálaldagaid Cuokcavuonas máŋggaid jagiid, ja mii leat ilus go beassat doarjut sin ovddidanprošeavtta, dadjá sámediggeráđđi Silje Karine Muotka (NSR).

Sámediggeráđđi vuorjašuvvá das movt koronapandemiija váikkuha sámi guovlluid ealáhuseallimiidda, ja erenoamážit mátkeealáhusaide.

– Danne galget mátkeealáhusfitnodagat, maidda koronapandemiija lea erenoamážit čuohcan ja main leat buorit ovddidanprošeavttat, áinnas ohcat doarjaga Sámedikkis, dadjá Muotká.

163 000 ruvdnosaš doarjja addojuvvo Máŋggabealat ealáhusaid doarjjaortnegis. Arctic Nuvsvåg lea Sámedikkis máŋgii ovdal ožžon doarjaga ovddidanprošeavttaide.

Gažaldagaide vástida dahje addá jearahallama sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no