Doarjja ovdánahttit sámi oahpponeavvuid

Doarjja ovdánahttit sámi oahpponeavvuid

Sámediggeráđđi juolluda 25 miljon ruvnno sámi oahpponeavvuid ovdánahttimii.

Sámediggi addá jahkásaččat doarjaga ovdánahttit dábálaš ja earenoamážit heivehuvvon oahpponeavvuid vuođđooahpahussii, sihke davvi- julev ja lullisámegillii. Sámediggeráđđi lea 25 miljon ruvdnosaš doarjjajuolludemiin addán doarjaga ođđa oahpponeavvuid ráhkadeapmái ja numot diibmá ge de lea dán jagi maiddái addán doarjaga oahpponeavvuid ođasmahttit fágaođasteapmái. Sámediggi lea juolludemiid olis vuoruhan digitála oahpponeavvuid ovdánahttima.  

Sámegiella nubbingiella oahpahussii oahpponeavvut

Dán jagi juolludeamis lea Sámediggi addán 14,2 miljon ruvdnosaš doarjaga ovdánahttit ođđa oahpponeavvuid sámegiella nubbingiella fágii sihke julev-, mátta- ja davvisámegielaide.

– Mii leat ilus go dál galget ráhkaduvvot ođđa oahpponeavvut julevsámegillii, vuođđoskuvlla ja joatkkaoahpahusa ohppiid váste, gos mii diehtit lea stuora váilevašvuohta oahpponeavvuide, cealká sámediggeráđđi Mikkel Eskil Mikkelsen (NSR).

Buot oahpponeavvut mat ráhkaduvvojit leat digitála oahpponeavvut ja mat vuhtiiváldet ođđa oahppoplánaid áigumuša. Oahpponeavvut galget maiddái vuhtiiváldit persovdnasuodjalusa ja ráhkaduvvojit oahpponeavvuid universealla hábmema láhkaásahusa ektui.

Multi 1-4 ođasteapmi

Sámediggeráđđi lea maid addán doarjaga ođastit davvisámegielat Multi matematihkkagirjjiid ja neahttaosiid fágaođastusa ektui, 1.-4. jahkecehkiid váste.

– Mii diehtit ahte matematihkkagirjedeaddileamit davvisámegillii lea nohkan muhtin cehkiide, mii diehttelas čuohcá garrasit smávvaskuvladási ohppiid matematihkkaoahpahussii, go eai beasa geavahit sámegiel oahpponeavvuid matematihkka oahpahusas, dadjá Mikkelsen.

Dan dihte oaidná sámediggeráđđi hirbmat stuora ávkin go addá doarjaga davvisámegiel matematihkkii, ođastit girjjiid ja neahttaosiid ja almmuhit ođđa hámis daid vai buot skuvllat fas besset atnigoahtit sámegiel oahpponeavvuid oahpahusas, mat dasa lassin lea ođđa oahppoplánaide  heivehuvvon.

Fágaidrasttildeaddji

Fágaođastusa olis sisafievrriduvvojedje ođđa fágaidrasttildeaddji fáttát skuvlii, nu movt álbmotdearvvašvuohta ja eallimis birgen ja demokratiija ja mielborgárvuohta. Dát fáttát leat áibbas ođđasat oahppoplánaid oktavuođas, ja galget hástalit ohppiid dihtomielalaččat jurddašit servvodathástalusaid, ja -vejolašvuođaid birra.

– Sámediggeráđđi lea earenoamáš duhtavaš dainna go leat juolludan doarjaga ovdánahttit ja ráhkadit filmmaid mat ovddidit daid fáttáid, dadjá Mikkel Eskil Mikkelsen.

Geahča buot doarjjajuolludusaid sámi oahpponeavvuide 2020 (PDF, 111 kB)

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no