Doarjja Sámi giellavahkku prošeavttaide

Doarjja Sámi giellavahkku prošeavttaide

Dál lahkona sámi giellavahkku, ja Sámediggi sávvá ahte nu maŋggas go vejolaš servet ja lágidit sámegielat doaluid.

Deaddil ja stuora govva ihtá Sámi giellavahkus mii oainnusmahttit ja buoridit máhtu sámegielaid birra. Ulbmil lea buoridit sámegielaid stáhtusa,  ja  buoridit máhtu sámi giela ja kultuvrra birra olles servodagas. Juste dán vahku galget sámegielat gullot ja oidnot juohke sajis. Mánát ja nuorat leat ulbmiljoavkkus ja fáddá 2020:s lea árbevirolašmáhttu ja giella.

Sámediggeráđđi lea juolludan badjelaš 90 000 ruvnno doarjaga golmma giellaprošektii Sámi giellavahkkudoaluide. Ålgård skole Gjesdal suohkanis lea ožžon 35 800 ruvnno giellavahkku lágidemiide. Bådåddjo suohkan lea fas ožžon 40 000 ruvnno lágidit giellavahkkudoaimmaid mánáidgárddiin ja smávvaskuvllas, ja Mjøsan Dajve saemien siebrie oažžu ges 15 000 ruvnno olgodoaimmaide sámi giellavahkku oktavuođas.

Sámediggeráđđi Mikkel Eskil Mikkelsen (NSR) muitala ulbmila dáinna doarjjaortnegiin lea ahte álbmogis lea vejolašvuohta oahppat ja ovddidit sámegiela.

– Sámi giellavahkus, mii lea golggotmánu 19. beaivvis gitta 25. beaivvi rádjái, lea buorre liiba giellaoahppamii. Dán jagi lea nuppes go giellavahkku lágiduvvo, ja mu mielas orru vahkku oažžugoahtán sajáidaga servodagas, dadjá Mikkelsen. Skuvllat, mánáidgárddit, suohkanat ja sámi searvvit čájehit beroštumi lágidit doaluid ja ohcet doarjaga Sámedikkis.

Ålgård skuvlla 4a, áigot oainnusmahttit sámegiela ja kultuvrra sámi giellavahkku oktavuođas. Mihttun sis lea oahpahit ohppiide veahá sámegiela, duoji ja borramušvieruid birra. Bådådjo suohkan áigu sámi giellavahkku loktet lullisámi gelbbolašvuođa mánáidgárddiin ja smávvaskuvllain. Mihttu lea mánáide addit dakkár reaidduid maiguin sáhttet čiekŋudit lullisámi gillii, identitehtii ja kulturárbái. Mjøsa Davje Saemien Siebrie áigot lágidit olgodoaimmaid sámi giellavahkku oktavuođas. Sin mihttu lea ahte sámegielat mánát ja nuorat galget beroštišgoahtit sámegielas.

– Mii sávvat oaidnit olu ja hutkás gielladoaimmaid giellavahkku oktavuođas, danin mii eat bija nu alla gáibádusaid dáidda ohcamiidda, loahpaha Mikkelsen.

Doarjagat lea juolluduvvon doarjjarotnegis Giellaprošeavttat. Ohcanskovi gávnnat dáppe.

Jearahallama addá dahje vástida gažaldagaide sámediggeráđđi Mikkel Eskil Mikkelsen (NSR)
+47 917 42 161
mikkel.eskil.mikkelsen@samediggi.no