Doarjja Sámi Musihkkafestiválii

Doarjja Sámi Musihkkafestiválii

Sámediggeráđđi lea juolludan 166 250 ru Vuođđudussii Sámi Musihkkafestivála, prošektii mii galgá ovddidit ođđa visuála profiila sámi beassášfestiválii Guovdageainnus.

Vuođđudus Sámi Musihkkafestivála lea Sámi beassášmárkaniid stuorámus lágideaddji Guovdageainnus ja das lea ovddasvástádus hábmet ja heivehit prográmma ja márkanfievrridit festivála.

Visuála profiila galgá leat mielde dahkamin positiivvalaš ollislaš váikkuhusa publikumma ja gussiid ektui, seammás go dat hukse oktavuođa siskkáldasat buot festivála bargiid gaskkas.

Maja Kristine Jåma– Prošeakta lokte festivála profiila ja bures ođasmahttá festivála, dasa lassin go lokte bargiid ja stába gelbbolašvuođa, dadjá sámediggeráđđi Maja Kristine Jåma (NSR).

Čielga profiila lea mielde váikkuheamen dovddiideami ja gullevašvuođa. Prošeakta galgá maiddái loktet gelbbolašvuođa festivála digitála márkanfievrrideamis. Sámi Musihkkafestivála galgá maiddái oažžut oahpahusa ođđa profiila áigádeamis ja geavaheamis, ja festivála márkanfievrrideamis ja promoteremis iešguđege sosiála mediain.

– Mii oaidnit ahte dáinna prošeavttain áiggi mielde sáhttá maiddái ovddidit sámi artisttaid eanet, go festivála máhttá vuovdalit iežas ja dan prográmma buoret vuogi mielde, mii illudahttá hui sakka, dadjá Jåma.

Prošeavttas bargá Sámi Musihkkafestivála ovttas sámi grafihkkárin Sárgu ja dáiddáriin Kamilla Marie Triumf visuála profiila ráhkadeamis. Sis lea ovttasbargu maiddái eanet govvideddjiiguin geat galget dán jagi festivála áigge govvidit ja dahkat video festivála profileremii ja márkanfievrrideapmái.

Doarjja 166 250 ru lea juolluduvvon doarjjaortnegis ásahusovddideapmi.

Gažaldagaide vástida dahje addá jearahallama sámediggeráđđi Maja Kristine Jåma (NSR), mob. 472 42 366, maja.kristine.jama@samediggi.no