Doarjja sierra sámi kulturprošeavttaide geassit 2020

Doarjja sierra sámi kulturprošeavttaide geassit 2020

Golmma čeardda deaivvadeapmi (Tre stammers møte), dáidaga 3D-gaskkusteapmi, ceavzilis tekstiillat, dokumentárafilmmat, konsearttat ja máŋga musihkkavideo – geassit lea Sámediggeráđđi juolludan doarjaga iešguđege kulturprošeavttaide.

Riddosámit leat ožžon 36.000 ru Golmma čeardda deaivvadeapmái, mii lei sámi kulturlágideapmi ja dollojuvvui borgemánu vuosttaš vahkkoloahpa Roahpas. Dáiddalaš searvin lei earret eará OZAS, oappážagat Risten Anine ja Sara Marielle Gaup.

- Ohcan ovddiduvvui Sámedikki doarjjaortnega Kulturdoaibmabijut bokte, vuoruheamis Kulturlágideamit main fokus lea sámi kultuvrras ja servodatdigaštallamis. Doaibmabidju sáhttá movttiidahttit guovllu sámiid, dadjá sámediggeráđđi Henrik Olsen (NSR).

Riddoduottarmuseat lea ožžon 250 000,- ru kamera oastimii mainna lea vejolaš govvidit ja digitaliseret čoahkkádusa nu ahte dan sáhttá gaskkustit 3D-formáhtas. Dasa lassin áigu musea oastit dihtora mas lea doarvái stuorra kapasitehta prosesseret ja vurket 3D-govaid.

Áŋgiruššama 3D-gaskkustemiin sáhttá geahččat fárrolaga RDM prošeavttain mas lea sáhka sáhttit fállat čoahkkádusa ja čájáhusaid maid sii hálddašit digitála hámis. Digitaliserenprošeakta olahivččii eanet olbmuide máŋgga gillii, ja dasto sáhtášii heivehit gaskkusteami sidjiide geain leat lohkan- ja čállinváttisvuođat, ja heajos gullu.

- Prošeakta gaskkusta áiggi mielde sámi dáidaga ja kultuvrra eará vuogi mielde ja lea dieinna lágiin doarjjaortnega vuoruheami vuollásaš, dadjá sámediggeráđđi.

Rein film AS lea ožžon 200.000 ru buvttadandoarjjan dokumentára filbmii “Nok er nok”. Dokumentáras lea sáhka Máze joavkku birra, ja mainna lágiin sin bargu lei mielde bidjamin sámi dáidaga beaiveortnegii, ja sin historjjá ja Álttá- gičču birra.

- Dát historjá ii leat nu oahpis olggobealde Sámi. Filbma sáhttá leat mielde oainnusmahttimin dáiddáriid barggu ja gičču bokte sihke sámi dáidaga, muhto maiddá politihkalaš lihkadusa ja sámepolitihka nugo mii dan dál dovdat, dadjá sámediggeráđđi.

Birtavarre husflidslag lea ožžon 20 000,- ru prošektii Arctic wool mas lea sáhka ceavzilis tekstiillaid báikkálaš ávdnasiid geavaheami čuvgemis, máhtu ja báikkálaš resurssaid bokte gozihan dihtii

árbevieruid. Ceavzilvuođain oaivvilduvvo maiddái tekstiillaid goziheapmi ja divvun. Galget lágiduvvot eanet bargobájit ja kurssat šattuiguin ivdnemis, duhppemis ja njuikunkurssat. Olahusjoavkkus leat váldoáššis nuorra rávis olbmot ja mánát vai dát máhttu fievrriduvvošii sidjiide ovdal go dat nohká vuorasolbmuid fárus.

Frode Barth lea ožžon gierdomátkedoarjaga 35.000 ru doallat Árbi-konsearttaid Norggas ovttas Ellen A. Oskaliin.

Soai áiguba dahkat ođđa hámis sámi musihkkaprošeavtta duo-formáhtas mii lea vuođđuduvvon árbevieruide, muhto elektronalaš veahkkeneavvuiguin. Konsearttat galget dollojuvvot korona- gáržžidusaide dávistettiin.

Dasa lassin lea juolluduvvon doarjja golmma sierra musihkkavideo-buvttadeapmái:

Rieban BM Haglund musihkkabuvttadeapmi lea ožžon 50 000,- ru musihkkavideo buvttadeapmái artista Ánná Luohti Ville Söderbaum várás, ja lávlagii su boahttevaš álbumas.

Kajsa Balto lea ožžon 50 000,- su vuosttaš musihkkavideo buvttadeapmái vaikko dat lea su nubbi álbuma. Musihkkavideo galgá visualiseret tihttala "Buot eallá" sisdoalu.

Crazeville records lea ožžon 45 000,- ru buvttadit musihkkavideo artisttain Slincraze. Video ulbmilin lea ovdánahttit SlinCraze sihke artistan riikkaidgaskasaš márkanis, ja ovdánahttit sámi kultuvrra luođi geavaheami bokte.

- Buot dát ohcamat gullet Sámedikki musihkkaovddideami 2020 doarjjaortnega mihttomeari ja vuoruheami vuollái: Luođi ja sámi musihka oainnusmahttiin ja gaskkusteapmi riikka siste ja olgoriikkas, sámi musihkka sihke árbevirolaš ja ođđa vugiin. Áiggis goas ollu konsearttat ja festiválat šluhttejuvvojit šaddá musihkkavideo gaskkusteami molssaeaktun ollu artisttaide, ja dán háliidat mii doarjut, dadjá Henrik Olsen.

Eanet dieđuid ja jearahallama addá sámediggeráđđi Henrik Olsen (NSR) +47 907 75 219, dahje e-poasta: henrik.olsen@samediggi.no