Fuolas go unnán doarjjaohcamušat bohtet smávimus sámi gielain

Fuolas go unnán doarjjaohcamušat bohtet smávimus sámi gielain

Sámedikki jahkedieđáhus čájeha ahte leat unnán ohcamušat lulli-, julev,- bihtán- ja upmisámegiel guovlluin doarjjaortnegii Doarjja sámi giellaprošeavttaide. Sámediggeráđđi Mikkel Eskil Mikkelsen (NSR) lea fuolastuvvan dán dihte ja háliida eanet ohcamušaid.

– Mii eat dieđe siva dasa manne bohtet nu unnán ohcamušat, muhto koronapandemiija sáhttá leat okta sivain, dadjá Mikkelsen. Son jáhkká ahte dat maid sáhttá váikkuhan go bihtán- ja upmisámi giellaseminára ja lulli- ja julevsámi oahpahuskonferánssa, maid Sámediggi diibmá lei plánen lágidit, šluhttejuvvojedje korona dihte.Deaddil ja stuora govva ihtáSámediggeráđđi Mikkel Eskil Mikkelsen (NSR) Kenneth Hætta  

– Dát livčče leamaš arenat deaivat suorggi, gos livččiimet beassan dáid aktevrraid ohcat ruđaid, dadjá Mikkelsen.

Ulbmil doarjjaortnegiin Doarjja sámi giellaprošeavttaide lea ahte álbmogis lea vejolašvuohta oahppat ja ovddidit sámegiela. Sáhttá earret eará oažžut doarjaga ráhkadit sámegiel applikašuvnnaid ja spealuid dahje jorgalit dakkáriid sámegillii, doallat sámegielkurssaid rávisolbmuide, sámi báikenamaid čohkket dahje gaskkustit, ráhkadit digitála sátnegirjjiid sámegillii ja sámi gielladoaibmabijuide. Ođđa vuoruheapmi dán jagi dán doarjjaortnegis lea ráhkadit sámegielat digitála arenaid mánáide ja nuoraide, nugo e-valaštallama ja sosiála mediaid oktavuođas.

Soaitá šaddat váttis lágidit fysalaš deaivvademiid dán jagi koronapandemiija geažil, muhto lea maid vejolaš ohcat doarjaga lágidit neahttadeaivvademiid dahje smávit doaluid.  Deháleamos lea ahte sámi gielat ovddiduvvojit.

Sámediggeráđđi oaivvilda ahte Sámediggi ferte šaddat čeahpibun profileret daid vejolašvuođaid mat leat Sámedikkis.

– Dan dihte mii dál ávžžuhit ja hásttuhit olbmuid ohcat. Jus lea mihkkege eahpečielggas dahje jus leat gažaldagat, de lea beare váldit oktavuođa Sámedikkiin. Mii leat gergosat bagadallat. Mihttu lea ahte aktevrrat mat váldet oktavuođa galget lihkostuvvat iežaset barggus, dadjá Mikkelsen.

Dán jagi leat dán doarjjaortnegis golbma ohcanáigemeari, njukčamánu 1. beaivvi, miessemánu 15. beaivvi ja čakčamánu 1. beaivvi.

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no

Oppalaš govva das galle prošeavtta diibmá ožžo doarjaga doarjjaortnegis Doarjja sámi giellaprošeavttaide ja makkár vuoruhansurggiid siskkobealde:

Deaddil ja stuora govva ihtá