Gáibida ođđasit šiehtadallat Boazodoallošiehtadusa

Gáibida ođđasit šiehtadallat Boazodoallošiehtadusa

Sámediggi gáibida ođđasit šiehtadallat Boazodoallošiehtadusa erenoamáš dili dihte maid dálkkádatroassu dagaha Romssas ja Finnmárkkus. – Sámediggi ii leat duhtavaš roassodili gieđahallamiin, mas boazodoalloealáhus ain lea. Boazodoallošiehtadusa doaibmabijut fertejit speadjalastit duohta dili mas boazodoallu lea dál, dadjá sámediggeráđđi Hans Ole Eira (Gb).

Dán dálvvi dieđihuvvui ahte guohtunroassu lea šaddan servvodatroassun. Dá lea dilli mii ii noga vaikko muohta suddá. Ekonomalaš váikkuhusat dovdojit vel guhkes áiggi.

– Heahtedilis mii čuohcá viidát ja mas ollugat gillájit stuora goluiguin ja stuora bargonođiin, ja einnostuvvo ahte unnit boazodoallit gártadit dábálaš doaibmadoarjaga, de eat sáhte diktit 180 miljovnna ruvdnosaš dábálaš šiehtadusa orrut nu go lea, dadjá sámediggeráđđi Hans Ole Eira (Gb).

Vásihuslogut 2020 guohtunroasus čájehit ahte biergosisaboahtu unnui 32 proseantta, seammás go orohaga golut lassánedje 81 proseanttain 2019:s 2020 rádjái. Lassáneami sivvan lea fuođđariid oastin. Dát lei vel ovdal dálá boaldámuša ja fuođđara haddegoargŋuma. Sámediggi vuordá sullasaš haddegoargŋuma dán dálvvi maid. Lassin dasa leat boazoeaiggádiid golut lassánan sakka alla bensinhattiid dihte. Dehálaš erohus 2020:s lea ahte dán jagáš guohtunroasus fertejedje boazoeaiggádat ieža fievrridit lassifuođđara, 2020:s válddi stáda stuorit ovddasvástádusa. Heajos miessešaddu dagaha ahte máŋggas eai oaččo dábálaš doaibmadoarjaga ja ahte gaskaoamit eai olát ealáhussii, nu go jurddašuvvon.

Boazodoallobearrašat leat dieđihan issoras dearvvašvuođalaš  ja ekonomalaš nođiid, juoga maid olu fágabirrasat duođaštit. Eaktun buori dearvvašvuhtii lea diehttevašvuohta.

– Jus áigut boazodoalu heahtedili duođas váldit, de ferte buvttihit buoret diehttevašvuođa ođđa šiehtadallamiid bokte ja geahčadit árvaluvvon eavttuid, dadjá sámediggeráđđi Hans Ole Eira (Gb).

Eira lohká ahte vásáhusat ovddeš roasuin, maŋemus 2020:s, čájehit ahte njuolga doarjjaortnegat eai adnon ja ruhta sirdojuvvui eará doaimmaide maŋŋil, earret eará unnán njuovvama dihte. Son lohká ahte dán jagi sáhttá čoavdit ášši árabut.

– Dán jagáš roassu lea máŋgga ládje duođaleabbo go 2020 roassu, danne go unnán njuovvanbohccot ja lassánan golut sihke fuođđariin ja boaldámušas čuohcá oktiibuot garraseappot. Dasa lassin eai leat boazodoallit háhppehan cegget liigeruđa 2020 roasu rájes, dadjá Eira.

Lea dieđihuvvon guohtunroassu sihke Romssas ja Finnmárkkus ja osiin Nordlánddas maid. Danne oaivvilda Eira ahte boazodoallošiehtadus ferte  rievdaduvvot guvllolaččat guovlluide mat leat heađis. Guovllut maidda ii guoskka, ožžot doaibmadoarjaga nu go dábálaččat.

Loga Boazodoallošiehtadusa šiehtadusjahkái 2022/2023

Jearahallama addá ja gažaldagaid vástida sámediggeráđđi Hans Ole Eira (GB), +47 918 61 471, hans.ole.eira@samediggi.no