Govvasátnegirji unnimusaide bihtánsámegillii

Govvasátnegirji unnimusaide bihtánsámegillii

Sámediggi lea juolludan 30 000 ruvnno bihtánsámegillii jorgalit govvasátnegirjji mánáide. – Dákkár girjjit leat dehálaččat giela ealáskahttinbarggus, lohká sámediggeráđđi Mikkel Eskil Mikkelsen (NSR).

Bihtánsámegiela čállingiella dohkkehuvvui 2019:s, ja dan rájes lea okta girji almmuhuvvon bihtánsámegillii. Dál lea sámediggeráđđi juolludan 30 000 ruvnno almmuhit nuppi girjji bihtánsámegillii. Lea Trøndelága fylkasuohkanii gii lea ohcan ja ožžon doarjaga buvttadit girjji Muv tuvsan vuostas bágo bihtánsámegillii. Girji lea ovdal almmuhuvvon davvi-, julev- ja lullisámegillii. Árjepluovi suohkan Ruoŧas ja Trøndelága fylkagirjerájus leaba fárus ruhtadeamen prošeavtta.

Sámediggeráđđi Mikkel Eskil Mikkelsen (NSR) oaidná dehálažžan doarjut prošeavttaid mat ovddidit sámegiela, ja erenoamážit go lea sáhka gielas mii gosii lea oalát jávkan.

– Ealáskahttinbargu mii dál dahkko bihtánsámegiela ektui, lea máilmmi dehálaš, ja girjjiid buvttadeapmi mánáide hukse vuođu boahtteáiggi giellageavaheddjiide, lohká Mikkelsen.

Internašunála oktavuođas leat sámegielat áitojuvvon gielat, garrasit áitojuvvon dehe juo gielat mat leat oalát jávkagoahtán. Dan geahčestagas lea dárbbašlaš doarjut sin geat háliidit buvttadit neavvuid; nu go girjjiid, giellaealáskattimii.

Sámediggi lei plánen lágidit ubmi- ja bihtánsámegiel giellaseminára dán čavčča seammás go leat vuordime guorahallama bihtánsámegiela dili birra, muhto Covid-19 dávdda leavvama geažil, de lea dát seminára maŋiduvvon.

– Go seminára ii šatta nu go lei jurddašuvvon, de lea illudahtti go sáhttit doarjut bihtánsámegielat girjealmmuheami, loahpaha Mikkelsen.

Doarjja lea juolluduvvon doarjjaortnegis Giellaprošeavttat.

Jearahallama addá dahje vástida gažaldagaide sámediggeráđđi Mikkel Eskil Mikkelsen (NSR)
+47 917 42 161
mikkel.eskil.mikkelsen@samediggi.no.