Háliida ahte eanebut áŋgiruššet dásseárvvuin

Háliida ahte eanebut áŋgiruššet dásseárvvuin

Dásseárvvus sohkabeliid gaskkas lea sáhka iešmearrideamis, vuoiggalašvuođas ja ovttaárvosašvuođas, sihke oktasaččat ja oktagaslaččat. Nissoniin ja albmáin galget leat seamma vuoigatvuođat ja vejolašvuođat buot servodatsurggiin. Golggotmánu dievasčoahkkimis geige sámediggeráđđi iežas dásseárvopolitihkalaš čilgehusa sohkabealdásseárvvu birra.

Deaddil ja stuora govva ihtáSámediggeráđi dásseárvopolitihkalaš čilgehus sohkabealdásseárvvu birra lea dán áigodaga viđat čilgehus dásseárvosuorggis. Sohkabealdásseárvu lea árbevirolaččat dat man birra ollugat jurddašit go lea sáhka dásseárvvus, ja sohkabealdásseárvorahčamuš lea máŋgga láhkai bolton geainnu daid eará áŋgiruššansurggiide dásseárvosuorggis, nu go dásseárvu doaibmavádjit ja LHBTIQ sápmelaččaide, veahkaváldeproblematihkka Sámis ja rahčamuš vaššidovddahemiid vuostá. Dát áŋgiruššansuorggit leat vuođđun Sámedikki ođđa dásseárvodieđáhussii mii galgá meannuduvvot dasto dán áigodagas.

– Sohkabealdásseárvu lea ain hui áigeguovdilis fáddá máŋgga servodatsuorggis. Maŋimus jagiid dutkan lea almmustahttán stuorra erohusaid sohkabeliid gaskkas deaŧalaš surggiin sámi servodagas, dadjá sámediggepresideanta Aili Keskitalo (NSR).

Oahpahussuorggis mii diehtit ahte eanet sámi albmát go nissonat heitet gaskan joatkkaoahpahusas, ja ahte nissoniidda lea váddásat ásahit iežaset ovdamearkka dihtii vuođđoealáhusaide. Sámediggeráđđi háliida ahte sohkabeliin galget leat seamma vejolašvuođat.

Bargu ja árbedieđu viidásat fievrrideapmi sámi ealáhusain galgá addit buot sohkabeliide duohta fidnooassálastinvejolašvuođa. Eaktun nana sámi ealáhuseallimii lea ahte ovddiduvvo máŋggabealat bargomárkan mii lea govddit iešguđetlágan doaimmaid ektui, ja bargoeallin mas lea buoret dássedeaddu sohkabeliid gaskkas.

– Mii oaidnit dálá bargoeallimis rievdama mas nissoniid rolla dađistaga nannejuvvo. Eanet nissonat ásahit iežaset árbevirolaš almmáifidnuide ja nissoniid váikkuhanfápmu vuođđoealáhusain nannejuvvo, gávnnaha Keskitalo. 

Dattetge váldá áiggi nannet nissoniid váikkuhanfámu ja oassálastima árbevirolaš almmáifidnuide. Sámi servodagas leat sohkabealrollat mat eai soaba duohta dásseárvojurdagii. Sámediggi áigu láhčit dilálašvuođaid eanet dutkamii ja statistihkkii dásseárvosuorggis.

– Árbevirolaččat lea sohkabealdásseárvu adnojuvvon nissonáššin, ja máŋgga suorggis dat ain lea nu, gávnnaha sámediggepresideanta Keskitalo, muhto sámediggeráđđi háliida ahte eanebut áŋgiruššet dásseárvobargguin ja searvvahuvvojit dasa.

– Min mielas lea deaŧalaš ahte sihke nissonat ja albmát servet digaštallamii, ja mii háliidit ahte Sámediggi galgá leat ovddasmannin ja buorrin ovdamearkan dásseárvvu oktavuođas, loahpaha presideanta.