Juolluda váile 2 miljovnna ruvnno sámi girjjálašvuhtii

Juolluda váile 2 miljovnna ruvnno sámi girjjálašvuhtii

Sámediggeráđđi lea meannudan 2020 giđa girjjálašvuođaohcamušaid, ja vuoruha addit doarjaga mánáidgirjjiide julev- ja máttasámegillii.

Sámediggi lei ožžon logenár ohcamuša smávit lágádusain ja eará girjjálašvuođaaktevrrain. Ohcanvuđot 2020 girjjálašvuođabušeahtta lea 2,85 millijovnna ruvnno.

– Go girjjálašvuođaohcamušaid vuođul dán vuoro juolluduvvo váile 2 millijovnna girjjálašvuhtii, de dat duođašta alla dási girjjálašvuođaohcamušain, dadjá sámediggeráđđi Henrik Olsen (NSR).

Ohcamušat ledje girjái ja fátmmastit viidát čáppagirjjálašvuođa, go ledje ohcamušat sihke mánáid, nuoraid ja rávisolbmuid várás. Maiddái fágagirjjálašvuohta lea gokčojuvvon dán ohcanvuorus, go duodjegirjjit Várjjat guovllus leat ožžon doarjaga.

Trøndelága fylkkagirjerájus ja Árran julevsáme guovdásj oažžuba doarjaga rámmašiehtadusaid bokte ovddidit mánáidgirjjiid mátta- ja julevsámegillii. Dál lea vuosttaš geardde go Árran julevsáme guovdásj oažžu rámmašiehtadusa fuolahit mánáidgirjjiid julevsámegillii. Rámmašiehtadusa bokte jorgaluvvojit moanat girjjit sihke mátta- ja julevsámegillii, ja nu ordnejit čáppagirjjálašvuođafálaldaga mátta- ja julevsámegielat mánáide.

– Dát doaibma lea earenoamáš bures lihkostuvvan máttasámis gos leat ilbman ollu mánáidgirjjit máttasámegillii maŋemuš jagiid, dadjá Olsen.

Lea maiddái stuorra dárbu nuoraid girjjálašvuhtii, ja dán ohcanvuorus leat máŋga prošeavtta ožžon doarjaga mat vuoruhit nuoraide fálaldaga. Thomas Hansen oažžu juo goalmmát ja maŋemuš girjái Jápmingilvu-trilogiijas doarjaga.

Boahtte ohcanáigemearri Girjjálašvuođabuvttadeami doarjjaortnegis lea golggotmánu 1. beaivvi 2020.

Obbalašgeahcastat girjjálašvuodaprošeavttat 2020 gida (PDF, 406 kB)

Jearahallama addá dahje vástida gažaldagaide sámediggeráđđi Henrik Olsen (NSR), 907 75 219, henrik.olsen@samediggi.no.