Juolludan vihtta kultur- ja valáštallanstipeandda 2020

Juolludan vihtta kultur- ja valáštallanstipeandda 2020

Sámediggi juolluda kulturstipeanddaid jahkái 2020 musihkkárii, buvttadeaddjái ja DJ:ii Peder Niilas Tårnesvikii, artistii Emil Karlsenii ja artistii Lávre Johan Eirai, ja valáštallanstipeanddaid 2020 dávgebáhččái Amalie Storelvii ja kickboksárii Oliva Braastadii.

–  Dán jagi leat leamaš ollu nana ohcamat. Dat čájeha ahte mii nagodat rekrutteret sihke valáštallamis ja kultursuorggis, ja ollugiin lea alla dássi maiddái nationála dásis ja riikkaidgaskasaččat, dadjá sámediggeráđđi Henrik Olsen (NSR).

Sámedikki kultur- ja valáštallanstipeanda galgá movttiidahttit sámi nuoraid bargat dáidaga, kultuvrra ja valáštallama oktavuođas. Midjiide bohte 13 ohcci, ja buohkat olahedje eavttuid. 7 ledje valáštallanstipeandda ohcama ja 6 ledje kulturstipeanda ohcama. Sin gaskkas ledje 5 gándda ja 1 nieida ohcan kultursuorggis, ja 3 gándda ja 4 nieidda ledje ohcan valáštallanstipeandda. Sin gaskkas ledje viđas geat ožžo stipeandda, 25 000 ru guhtege.

– Dán jagi mii addit ovtta stipeandda eanet, sihke danne go ledje ollu nana ohccit, muhto maiddái movttiidahttimin koronajagis, go ollu nuorain leat leamaš fuonit vejolašvuođat dinet ruđat, dadjá Olsen.

Dás vuolábealde čilget manne sii ožžo stipeandda:

  • Peder Niilas Tårnesvik, Bergen - Dáidda: Peder Niilas Tårnesvik, alias Niilas, lea gudneáŋgiris ja nuorra musihkar, buvttadeaddji ja DJ, gii ovdal lea almmuhan 2 EP, ja almmuhan debuhtaálbuma 2020:s. Son lea elektronikabuvttadeaddji, ja lea bargan musihkain juo árrat nuorravuođa rájes. Son lea earret eará čužžon lávddis diimmá geasi go Márkomeanut lágidii konseartta Oslos ja lea maiddái ovdal čužžon Riddu Riđđu, ja  by:Larm! lávddis. Son lea maiddái buvttadan musihka ollu artisttaide ja lea bargan elektronihkka instruktevran. Son lea gelddolaš artista sámi musihkain, ja doaibmá maiddái gelddolaš lassin elektronihka siskkobealde. Son lea ožžon buori kritihka sihke Norgga ja riikkaidgaskasaš preassas. Son oaččui NOPA-stipeandda 2017:s mii addojuvvo nuorra, vitmadis lávllačálliide.
  • Emil Nikolaus Karlsen, Čávkkus/Oteren - Dáidda: Emil Karlsen lea nuorra ja vitmadis sámi artista, gii lea ožžon ollu fuomášumi maŋimuš áiggis. Son álggahii karriearas Resirkulert-joavkkus lávlun ja gitaristan. Son válljejuvvui 2019:s Riddu Riđđu nuorra dáiddárin, ja lea maŋŋá buvttadan sámi lávlagiid ja luđiid. Son lea váldán ruovttoluotta iežas sámi árbbi ja identitehta ja lea oahppan sámegiela. Son lea maiddái dahkan musihka ollu teáhterbihtáide. Son lea earret eará leamaš Nordlysfestivála lávddis, ja lea 2020:s orron Lásságámmes, gos son lea bargan musihkain ja čállán ođđa lávlagiid sámegillii man boađusin galggašii šaddat soloálbuma. Maŋimuš jagis lea son dulkon máŋga Áillohačča bihtá, ja lea ožžon vejolašvuođa čiekŋudahttit iežas eanet juoigamis, ja erenoamážit lea dutkan mearrasámi luđiid. Maŋimusat lea son čužžon Riddu Riđđu digitála lávddis stream sápmi vuolde.
  • Lávre Johan Eira, Guovdageaidnu/Kautokeino - Dáidda: Lávre Johan Eira lea gelddolaš, nuorra sámi artista, geas leat ollu vejolašvuođat. Son lea juo čalmmustan iežas ollu lávddiin nugo ovdamearkka dihtii Sámi Grand Prix lávddis, guosseartistan «SGP-Covered prosjekt» prošeavttas. Son lea maiddái čuojahan Riddu Riđđu digitála konsearttas 2020:s. Son lea ovttas bargan muhtun sámi artisttaiguin ja lea ožžon earret eará Ishavskraftas kulturstipeandda soloprošeavttain “Lávre”, mas leat ruohttasat sámevuođas, ja seammás sattáhallan áimmus. Son lea ožžon maiddái Unge Talenter-stipeandda 2020. 2019:s almmuhii son bihtá Beaivenieida. Su musihkas leat teavsttat sámegillii ja nuohtat juoigama vuođul.  Lávre Johan Eira lea ain nuorra, ja sus ain lea čuovgadis artistakarrieara ovddabealde.
  • Amalie Storelv, Lidaláddi/Liland - Valáštallan: Amalie Storelv láve báhčit dávgebissuin, ja sus lea juo guhkes vásihusat nuorra agis beroškeahttá. Son lea válljejuvvon dávgebissobáhčinsearvvi nuoraid riikasearvái, ja sus leat máŋga Norgga Meašttirvuođa medállja, ollu norgga olahusat ja son vuittii Barents Summer Games 2019 luohkástis. Su ulbmilin lea searvat sihke EM ja MM gilvvuide 2021:s. Čájeha ahte son su attáldagaiguin sáhttá gilvalit buoremus nuoraid searvvis Norggas, ja son lea erenoamáš rollamodealla suorggistis.
  • Oliva Braastad, Ráisa/Nordreisa ja Oslo - Valáštallan: Oliva Braastad lea bajásšaddan Olmmáivákkis ja Ráissas Davvi-Romssas. Son lea fárren Oslos, gos son hárjehallá kickboksema nationála dásis. Son šattai nuoraid norggameašttirin kickboksemis 2018:s, ja hárjehallá gudneáŋgiris dásis. Son hárjehallá riikka buoremus valáštalliiguin, ja lea hárjehallan maiddái Olympianjunnožis attáldatčoagganeami oktavuođas. Son álggahii valáštallama Taekwondos, muhto lea sirdán kickboksemii. Son lea vuoitán maiddái Scandinavian Open nuoraidluohká. Son lea maiddái buorre rollamodealla mánáide, ja son skuvle 3-13 ahkásaš mánáid.  

Ovdalaš vuoitit:
2008:
Finn Hågen Krogh (čuoigan)
Odd Isak Kappfjell (judo)
2011:
Valáštallanstipeanda: Christer Kjønsø Karlsen, Silje Wilsgård ja Marie Sofie H. Hætta
Kulturstipeanda: Marja Helena Fjellheim Mortensson
2014:
Valáštallanstipeanda: Ole Mathis Sara Nedrejord ja Aslak Ole Eira
Kulturstipeanda: Ina-Theres Andrea Sparrok, Sarakka Gaup ja Anne Maia Raanes Sørensen
2016:
Valáštallanstipeanda: Rakel Birkeli ja Jan Arthur Reinås
Kulturstipeanda: Anna Linea Fjellheim Varsi ja Ella Marie Hætta Isaksen
2018:
Valáštallanstipeanda: Benedicte Guttorm ja Sajane Karina Olsen
Kulturstipeanda: Anna Kaisa Partapuoli ja Johan Daniel Turi
2019:
Kulturstipeanda: Ánna-Katri Helander
Valáštallanstipeanda: Amalie Kristine Triumf
Peder Funderud Skogvang
Tuva Sirin Schall Mikkelsen

Jearahallama addá ja vástida gažaldagaide sámediggeráđđi Henrik Olsen (NSR), 907 75 219, henrik.olsen@samediggi.no.