– Mearraluossabivdit fertejit leat mielde go ruoššaluosaid geahpedit

– Mearraluossabivdit fertejit leat mielde go ruoššaluosaid geahpedit

Sámediggi bivdá ahte Dálkkádat- ja birasdepartemeanta atná ruoššaluosa laskama duođalažžan. – Deháleamos lea čohkkegoahtit joavkkuid mat sáhttet veahkkálagaid bivdit eret ruoššaluosaid ja jođánit ráhkadišgoahtit plánaid eastadit viidáset leavvama. Mearrasámi birrasiin lea dása gelbbolašvuohta, dadjá sámediggeráđđi Silje Karine Muotka (NSR).

Silje Karine Muotka Kenneth Hætta Ollugat leat fuolastuvvan go ruoššaluossa sakka lassána Finnmárkku jogain. Sámediggi ballá ahte dát amas guollešládja sáhttá jávkadit árbevirolaš luossašlágaid ja bilidit ekovuogádagaid balánssa. Jos Atlántaábi luossašládja vátnu, de árbevirolaš bivdinkultuvra jávkagoahtá sihke vuotnaguovlluin ja jogain, dadjá sámediggeráđđi.

– Mun lean nu rámis ja duhtavaš bargguin maid ollugat leat eaktodáhtolaččat bargan dán geasi. Sii leat bivdán ja áŋgirit geahččalan gurret ruoššaluosaid jogain, ja leat maid viggan hehttet vai eai nagot gođđat jogain, muhto dat ruđalaš doarjja sidjiide gal lea menddo unnán, dadjá Muotka.

Lea biddjon 15 miljovnna ruvnnu govddodangillariidda mat leat biddjon Finnmárkku jogaide jávkadan dihtii ruoššaluosa. Dálkkádat- ja birasministara Sveinung Rotevatn (G) plánain eai leat biddjon doaimmat mo ruoššaluosa sáhttá mearas bivdit eret. Dálkkádat- ja birasdepartemeantta mihttun ferte leat ahte buohkat veahkkálagaid jávkadit ruoššaluosa. Dá lea bargu mainna lea hoahppu ja buot resurssat fertejit geavahuvvot, ovdalgo ruoššaluossa fas vuodjagoahtá jogaide jagis 2023.

– Sihke báikkálaš ássit, vuotnabivdit, johkabivdit ja Sámediggi fertejit fárrolagaid hábmet ođđa strategiija, ja lea moaitin veara go buohkat eai beasa dása oassálastit. Mii fertet jođánit ovttasráđiid ráhkadit plánaid ja mearrasámi birrasat leat dehálaččat dán barggus, dadjá Muotka.

Vejolaš dienasávkin

Ruoššaluossa han lea amas guolli min čázádagain. Ruoššaluossa lea buorre biebmu jos dan bivdá mearas, muhto stukkis jogain ja go gorgŋe johkii gođđat.

– Norggas soaitit sáhttit atnit ávkki das, ahte juogo vuovdá varas ruoššaluosa dahje ráhkada biebmobuktagiid das. Jus mearas beasašii valjit dáid bivdit, de ii livččii áittan biologalaččat, ii ge livččii goarádussan báikegottiide, muhto baicca liigedienasin, loahpa sámediggeráđđi Silje Karine Muotka.

Jos háliidat jearahallat, de váldde oktavuođa sámediggeráđiin Silje Karine Muotkain (NSR), tlf: 984 87 576