Miljovnnat sámi mánáidgárdeprošeavttaide

Miljovnnat sámi mánáidgárdeprošeavttaide

Sámediggeráđđi lea juolludan 4,4 miljon ru 27 prošektii mánáidgárddiin mat árjjalaččat barget sámi giela ja kultuvrra nannemiin ja ovddidemiin mánáidgárddiin.

– Dán jagi leat boahtán eanet ohcamat go ovddit jagiin, ja dat lea hui buorre. Dás sáhttá várra leat dahkamuš Sámedikki ovddidanprošeavttain SáMOS, dahje ahte eanet háliidit addit sámefálaldaga mánáidgárddiin, dadjá sámediggeráđđi Mikkel Eskil Mikkelsen (NSR).

Doarjjaortnegis leat dán jagi vuoruhan doarjagiid prošeavttaide ja ovddidanbargui mánáidgárddiin, ja dat leat giellaovddidanprošeavttat, báikkálaš ovddidanprošeavttat main deattuhuvvo árbevirolaš bargu, ođđa sámegielat mánáidgárdefálaldaga ásaheapmi ja daid pilohttamánáidgárddiid ovddideapmi mat leat válljejuvvon leat mielde mánáidgárdeprošeavttas SáMOS (Sámi mánát ođđa searvelanjain).

Dán jagi ruđat leat mannan 10 giellaprošektii, 13 báikkálaš ovddidanprošektii main deattuhuvvo sámi árbevirolaš bargu ja njealji prošektii main lea oktavuohta pilohttamánáidgárddiid ovddideapmái.

Geahča buot 2021 juolludemiid prošeavttaide ja ovddidanbargguide mánáidgárddiide dás (PDF, 142 kB)

Giellaovddidanprošeavttat

Mikkel Eskil Mikkelsen Árvu/Sámediggi Vuoruhemiin giellaovddidanprošeavttaide oažžu earret eará Furua mánáidgárdi Álttás 125 500 ru iešguđege doaibmabijuide maiguin ovdánahttet sámi giela ja kultuvrra. Mánát galget earret eará oahppat muhtun sámegiel sániid, árbevirolaš sámi duhkoraddanvugiid, ja searvat bohccuid njuovvamii ja miessemearkumii. Eará mánáidgárdi Álttás, Holmen gårds- og naturbarnehage, oažžu 55 000 ru mánáid duhkoraddama riggudahttimii ja movttiidahttimii ávdnasiiguin ja vásihusaiguin mat ovdánahttet sámi giela ja kultuvrra.

Giellaprošeavttain oažžu maiddái Ferista friluftsbarnehage Troanddimis 100 000 ru prošektii sámi giellakursa, man oktavuođas háliidit addit sámi mánáid vánhemiidda Trondheim gielddas vejolašvuođa oahppat sámegiela mánáiguin ovttas. Dat galgá leat kursa maŋŋá gaskabeaivve vánhemiidda davvisámegielas, máttasámegielas ja julevsámegielas.

– Deattuhuvvon lea ahte jos sámegielaid galggaš sáhttit ealáskahttit Troanddimis, de gáibiduvvo ahte maiddái vánhemat ožžot vejolašvuođa oahppat giela, dadjá Mikkelsen.

Báikkálaš ovddidanprošeavttat main sámi árbevirolaš bargu deattuhuvvo

Vuoruhemiin báikkálaš ovddidanprošeavttain main deattuhuvvo sámi árbevirolaš bargu, ožžot earret eará Rishaugen mánáidgárdi Álttás 128 000 ru sámi giela ja giellavásihusaid nannemii. Sii galget earret eará fitnat gárdde luhtte ja leat mielde bohccuid njuovvamis.

Espira mánáidgárdi báikkis Stjørdal oažžu 75 000 ru smávva mánáid sámi kulturgaskkusteapmái ja giellamovttiidahttimii. Prošeavtta ulbmilin lea sihkkarastit ahte mánát ja bearrašat sáhttet ovdánahttit sin sámegiela ja sámi kultuvrra.

– Dát mánáidgárdi ii leat ohcan doarjaga ovdal, ja lea somá oaidnit go sii háliidit ahte sámi giella ja kultuvra galgá lea oassin sin mánáidgárdeárgabeaivvis, dadjá Mikkelsen.

Ođđa ohcanvuorru jahkái 2022 rahppojuvvo guovvamánu álggus.

– Mun ávžžuhan mánáidgárddiid main lea sámegielat fálaldat, ja mánáidgárddiid mat háliidit addit fálaldaga mii ovddida sámegielat mánáid sámi giella- ja kulturgelbbolašvuođa ohcat, dadjá Mikkelsen.

Jearahallama addá ja gažaldagaide vástida sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no