Mo SeastinBáŋku 1 Davvi-Norga sáhttá veahkkin seailluhit boaittobealeguovlluid vuođđoinfrastruktuvrra?

Mo SeastinBáŋku 1 Davvi-Norga sáhttá veahkkin seailluhit boaittobealeguovlluid vuođđoinfrastruktuvrra?

Sámediggeráđi Silje Karine Muotka (NSR) oaivvilda ođas das ahte SeastinBáŋku 1 Davvi-Norga gidde beali sin kantuvrrain, earret eará Deanus ja Kárášjogas, lea fuolastuhtti infrastruktuvrra, boaittobealeguovlluid ovdánahttima ja sámi álbmoga hárrái.

Kundariid geavahanvugiid rievdan, garra haddegilvu ja vuorddehahtti demográfalaš ovdáneapmi leat ággan dán viiddis giddemii. Sámi álbmogii lea dát báŋkofálaldat leamaš okta moatti fálaldagas mas sámegiella lea doalahuvvon báŋkku bálvalusas. Dat mearkkaša ahte Deanu ja Kárášjoga kantuvrraid gidden mielddisbuktá ahte sámegiela gáhttema eavttut hedjonit.

Báŋkokantuvrraid heaittiheapmi ii váikkut duššefal demografiijii, báikkálaš ealáhusdoaimmaide ja infrastruktuvrii, muhto maiddái dáid guovlluid ealáhusovdánahttimii.

– Ii leat mihkke čiegusvuođaid ahte ahte báŋkokantuvrraid čeahpes fágaolbmot sáhttet veahkehit báikkálaš entreprenevrraid ipmirdit dáid guovlluid ruhtadandárbbuid, dadjá Muotka.

– Báikkálaš báŋkobargit dihtet ahte lea divrras hukset ovdamearkka dihtii eanandoalu doaibmavisttiid, ja ahte árktalaš guovlluin lea divraseabbo hukset go eará guovlluin. Danin leat mii fuolas go diekkár lagasvuohta ja gelbbolašvuohta jávká.

– Áŋgiruššan dihtii boaittobealbáikepolitihkkii ásahii daláš ráđđehus guovlo- ja regiovdnalávdegotti 2005:s. Jearaldahkan lea de ahte maid mii galgat guovlolávdegottiin go eai leat šat báŋkkut, poasta, politiijat, eaige doaktárat boaittobealeguovlluin, dadjá Muotka.

Báŋkku neahttasiiddus sáhttá lohkat “Min luhtte deaivvat ráđđeaddiid geain lea báikkálaš máhttu sihke viessomárkanis ja ealáhusdoaimmain, ja spesialisttaid geat sáhttet veahkehit juohke suorggis. Kunddarin leat don maid veahkkin doalaheamen ahte stuorámus oassi dietnasis bissu riikkaoasis daningo min stuorámus eaiggát lea Davvi-Norga. Dát addá midjiide vejolašvuođa doarjut máŋggaid prošeavttaid ja doaibmabijuid riikkaoasis.”

Kundara ja báŋkku gaska šaddá máŋgasiidda nu guhkkin ahte massá lagasvuođa báŋkui, ja báŋkobargit geain lea dehálaš ja mávssolaš báikkálaš diehtu eai leat šat olahanmuttus. Vaikke ollu báŋkobálvalusaid sáhttá doaimmahit digitálalaččat, de dat ii goittotge buhtte báikkálaš máhtu.

– Jus SeastinBáŋku 1 Davvi-Norga háliida veahkkin doalahit boaittobealeguovlluid vuođđoinfrastruktuvrra, de berrejit farggamusat jorgalahttit giddenproseassaid, ja baicca veahkkin loktet árvohuksema dainna go leat báikkis, ja áŋgiruššat báikkálaš ealáhusaide daiguin olbmuiguin geat orrot doppe, loahpaha Muotka.

Eanet dieđuid dahje jearahallama oktavuođas váldde oktavuođa sámediggeráđiin Silje Karine Muotkain (NSR), tlf 984 87 576 dahje e-poasta: silje.karine.muotka@samediggi.no