Oahpásmuva Sámedikkiin iežat giehtatelefovnna bokte

Oahpásmuva Sámedikkiin iežat giehtatelefovnna bokte

Sámediggi fállá dán geasi láidesteami gussiide sierra appa bokte giehtatelefovnnas. Fálaldat lea nuvttá ja sáhttá geavahuvvot vaikko goas jándoris.

 

– Sámedikkis livččiimet áinnas háliidan váldit vuostá gussiid, muhto njoammuneastadeami geažil, de eai beasa guossit gallestallat gárdima dán geasi. Dan sadjái de fállagoahtit gussiide vejolašvuođa oahpásmuvvat Sámedikkiin sierra audioguide bokte ja dát fálaldat čatnasa giehtatelefovdnii. Sávan fálaldaga leat ávkkálažžan ja vuogas bálvalussan ollugiidda, dadjá Sámedikki dievasčoahkkinjođiheaddji Tom Sottinen (Bb). 

Voice of Norway appas gulat eanet Sámedikki duogáža birra, earret eará manne lea ásahuvvon. Gulat maid Sámedikki doaimmaid birra sihke nationála ja riikkaidgaskasaš dásis, ja leat maiddái dieđut Sámedikki arkitektuvrra ja dáiddačoakkáldaga birra. Muitalat maid oasážiid sámi historjjás ja kultuvrras, ja guldaleaddjit besset maid guldalit Sámedikki čáppa luođi.

Jietnaláidesteapmi lea olamuttos buohkaide appa bokte man namma lea Voice of Norway. Olbmot geat galledit Kárášjoga sáhttet viežžat Sámedikki ruvttu (jietnabálgá) appas. Go leat Sámedikki olggobealde, de muitališgoahtá appa automáhtalaččat daid iešguđet jietnamuitalusaid dađis go váccaša Sámedikki birra. Fálaldat lea dál álggos dušše dárogillii, muhto viiddidat maŋŋil eará gielaide.

– Sávvat buohkaide bures boahtima oahpásmuvvat ja vásihit Sámedikkiin appa bokte ja illudat dassážii go guossit fas besset sisa Sámediggái, dadjá dievasčoahkkinjođiheaddji Tom Sottinen.

App-fálaldat lea nuvttá, ii leat eará go viežžat dan. Dán láidesteami sáhtát iežat leavttu ja jođu mielde geavahit, váccašit telefovnnain čuoggás čuoggái.

Ná barggat:

Iežat telefovnnas vieččat appa Voice of Norway. Oza doppe Sámedikki ja viečča/laste vulos ruvttu. Go leat viežžan ruvttu, de sáhtát jáddadit mobiilaneahta ja čuovvut ruvttu čuoggáid mielde. Jos leat nuppesajis dahje eará báikkis, de sáhtát maid geavahit dán appa go ozat Sámedikki. Deaddilat čuoggáid maid háliidat gullat dan ruvttus.

Lisa Marie Kristensen lea muitaleaddji ja GLR, Nils Martin Kristensen bokte, lea bádden ja buvttadan jietnamuitalusaid.

Dihtetgo ahte Sámediggi lea maid ráhkadan digitála čájáheami sámediggevisttis? Dan gávnnat dáppe.