Juhkosa dovdomearkkat lea ahte váldodoaimmat leat giellasuorggi politihkkaovddidanbarggut, ja hálddaša Sámedikki ohcanvuđot doarjagiid giellasuorggis. Juhkosis lea maiddái hálddašansbarggut (báikenammanevohat) ja siskkáldas bálvalusat (jorgalanbarggut).

Juhkosis leat sihke nuorra ja hárjánan bargit geat dagahit buori joavkku ja geat beroštit sámegielaid oainnusmahttimis ja ovddideamis. Sámegiella lea juhkosa bargogiella. Juogus lea, dego muđui maid Sámediggi, huksejuvvon lávdaduvvon struktuvrrain, ja juhkosa bargit barget iešguđetge kánturbáikkis. Juhkosis leat muhtun deaivvadanbáikkit jagi mielde, mat addet vejolašvuođa oahpásmuvvat bargoguimmiide ja Sámedikki eará kánturbáikkiide.   

Virgi heive bures olbmuide geat beroštit servodagas ja geat liikojit hástalusaide, čállimii ja áigodagaide go lea alla bargoleaktu. Virggis oahpásmuvat áigeguovdilis giellapolitihkkii, ja beasat čuovvut politihkalaš áššiid. Virgi galgá maid leat resursan jorgaleddjiide ja báikenammaáššemeannudeddjiide, ja beassá maid bargat konkrehta giellafágain. 

Sámedikkis leat olu kántorbáikkit maid gaskkas sáhtát válljet, ja don sáhtát bargat kántorbáikkis gos leat guoros kántorlanjat. Juste dál leat mis guoros kántorlanjat Kárášjogas, Guovdageainnus, Vuonnabađas, Aarbortes, Skániin, Snoasas, Romssas ja Ájluovttas.

Sámedikki bargit fertejit rehkenastit veahá mátkkoštit.

Barggut

Giellafágalaš ráđđeaddin/seniorráđđeaddin leat dus čuovvovaš barggut:  

• Rávvet, áššemeannudit ja čielggadit áššiid fágasuorggis mii váikkuha sámi giellafágalaš politihkka ja servodatovdáneapmái
• Čuovvulit fágasuorggi, ja leat mielde ovddideame fágasuorggi. Aktiivalaččat ohcát dieđuid, analyseret ja juohkit máhtu politihkalaš, fágalaš ja servodaga ovdáneamis
• Addit fágalaš rávvagiid, árvvoštallamiid ja ávžžuhusaid siskkáldas jorgalemiid ja báikenammaáššemeannudemiid oktavuođas
• Koordineret ovddidanbargguid ja bagadit sihke kollegaid ja earáid servodagas
• Ovddidit ja váldit atnui ođđa bargovugiid ja reaidduid
• Gulahallan ja ovttasbargu relevánta aktevrraiguin fágasuorggis
• Leat mielde ja jođihit fágasuorggi čielggademiid ja prošeavttaid

Du bargobeaivi hábmejuvvo dárbbuid mielde ja du gelbbolašvuođa mielde. Fertet rehkenastit ahte virggi ja juhkosa barggut ja ovddasvástádussuorggit rivdet ásahusa dárbbuid mielde.

Loga eanet virggi birra ja oza virggi Karrieresiiddus