Sámediggeráđđi ovddida dievasčoahkkinášši sámiid riektesihkarvuođa birra

Sámediggeráđđi ovddida dievasčoahkkinášši sámiid riektesihkarvuođa birra

Sámediggeráđđi áigu ovddidit dievasčoahkkinášši sámiid riektesihkkarvuođas giđđat 2021. – Ii leat eahpádus das ahte lea erohus sámiid rivttiin báhpira nalde ja rivttiin mat duođas ollašuvvet. Mii leat fuolas riektedilálašvuođas, dadjá sámediggepresideanta Aili Keskitalo (NSR).Deaddil ja stuora govva ihtáAili Keskitalo ja Silje Karine Muotka  

Sámiid riektesihkkarvuohta ii leat dušše dan duohken ahte makkár rievttit leat sajáiduvvon lágain ja riikkaidgaskasaš njuolggadusain. Sámi mánáin lea oahpahuslága mielde riekti sámegieloahpahussii, muhto ollu mánáid hárrái dát riekti ii čuvvojuvvo.

– Olmmošvuoigatvuođaláhka mearrida ahte sámiid ii sáhte gieldit kulturdoaimmaid čađaheames, muhto liikká mii oaidnit ahte stáhta diktá sisabahkkemiid čuohcat sámi kulturdoaimmaide, mat duvdet olbmuid eret iežaset ealáhusain, dadjá sámediggepresideanta.

Maŋemus jagiid leat sámit leamaš norgga duopmostuoluin, go vuos leat máŋggaid jagiid mannan áššemeannudemiid ja váidagiid čađa hálddašeamis. Máŋgasat vásihit dasto ahte ii duopmostuoluin ge leat ipmárdus dasa movt sisabahkkemat váikkuhit sin eallimii ja movt sin rievttit rihkkojuvvojit.

– Min bargu lea oaidnit ahte sámiid rievttit eai dulbmojuvvo go stáhtas ii leat dáhttu iige máhttu vuhtiiváldit sámi beroštumiid. Sámit geat guddet nođiid gádjun dihte iežaset kultuvrra, eai raža dušše iežaset dihte, muhto olles sámi servodaga dihte, dadjá sámediggepresideanta.

Sámedikkis lea odne ohcanvuđot riektedoarjjaortnet áššiide mat ovddiduvvojit duopmostuolus. Árabut dán jagi čielggai ahte Sámediggi doaibmagoahtá oasehasveahkkin áššis mas lea sáhka almmolaš sektoriid ovddasvástádusas Divttasvuona veahkaváldináššis.

– Mii leimmet álggos jurddašan vuordit dáinna áššiin dassážii leimmet geahččaladdan oasehasveahkkerollas, muhto mii árvvoštallat riektedilálašvuođa nu kritihkalažžan ahte dievasčoahkkinášši ii sáhte vuordit. Leat leamaš erenoamáš ollu sámi áššit duopmostuolus ja leat eambbo jođus. Ollu áššiin leat leamaš negatiivvalaš bohtosat ja oallugiidda leat gártan stuora áššegolut, dadjá sámediggeráđđi Silje Karine Muotka (NSR).

Áššit mat leat leamaš áigeguovdilat duopmostuolus leat earret eará Nussir- ja Riehppovuotnaášši, Deanusoahpamuš, Langesund-ášši Romssas, bieggafápmoindustriija Øyfjellas ja Fosenis, rájáidrasttideaddji boazodoallu earret eará Romssas, boazologuid unnideapmi, mearkariekti, mearraluossabivdu, lodden, riektekárten Finnmárkkus ja áššiid ođđasisrahpan boares lullisámi guovlluin.

– Leat ollu áššit ja leat stuora golut juohke áššis. Mii fertet dárkileappot geahččat movt Sámediggi sáhttá politihkalaš orgánan doarjut sámi vuoigatvuođaguddiid. Mii galgat earret eará árvvoštallat iežamet rolla, min gaskaomiid ja movt duopmostuolut gieđahallet sámi áššiid. Lea dehálaš ahte Sámedikki dievasčoahkkin beassá buktit oainnuid dáidda gažaldagaide, loahpaha Silje Karine Muotka.

Oktavuođadieđut:
Sámediggepresideanta Aili Keskitalo (NSR), tlf. 971 29 305
Sámediggeráđđi Silje Karine Muotka (NSR), tlf. 984 87 576