Sámedikki reviderejuvvon bušeahtta 2020

Sámedikki reviderejuvvon bušeahtta 2020

Sámediggeráđđi lea iežas reviderejuvvon 2020 bušeahttaevttohusas joatkán doaibmabijuid mat dorjot ealáhusaid ja kultureallima Sámis, maidda Korona lea maid garrasit čuohcan. – Lean maid ilus go dáinna evttohusain sáhttit haddelasáhusa addit buohkaide geat ožžot njuolggadoarjaga, lohká sámediggeráđi Henrik Olsen (NSR).

Korona-dilli lea váikkuhan maiddai sámi servodahkii nugo máilbmái muđuige, ja dat lea váikkuhan Sámedikki reviderejuvvon bušeahta.

Deaddil ja stuora govva ihtá

– Sámi ealáhusat ja kultureallin leat heahtedilis dál, ja sámediggeráđđi lea juo mearridan máŋga doaibmabiju main guovddážis lea doarjut min servodaga. Dan lea hui deaŧalaš dahkat, ja danin joatkit dákkár fokusiin min reviderejuvvon bušeahttaevttohusas, dadjá sámediggeráđi Henrik Olsen (NSR).

Sámediggeráđđi sáddii njukčamánus 2020 čállosa Gielda- ja ođasmahttindepartementii, mas daddjojuvvui ahte vurde 10,8 miljovnna ruvnnu doarjaga reviderejuvvon bušeahtas. Árabuš dán vahku gulaimet ahte ráđđehus evttoha 4 miljovnna juolludeami reviderejuvvon nationálabušeahtas koronadoaibmabijuide sámi ealáhusaide. 

– Lean ilus go ráđđehus lea guldalan min go leat dán áiggis vuorjašuvvan sámi ealáhusaid dihte, ja livččii deaŧalaš Stuorradikkis sihkkarastit eanetlogu dán evttohussii. Dasto mii vuordit ahte guovddáš eiseválddit veahkehit likviditehtadoarjagiin ja heahtedillepáhkaiguin mat deaivvašedje sihke sámi ealáhusaid ja sámi kultureallima bures, dadjá sámediggeráđi Henrik Olsen.

Sámediggeráđđi deaivá Stuorradikki finánsalávdegotti digitála čoahkkimis maŋŋebárgga miessemánu 19. b., gos fáddán maid galgat digaštallan leat muhtun dáin áššiin.

Ráđđehus lea iežas reviderejuvvon nationálabušeahttaevttohusas evttohan 2,25 miljovnna ruvnnu lassijuolludeami, mii galgá geavahuvvot Dielddanuori suohkana laktimii sámegiela hálddašanguvlui suoidnemánu 1. b. rájes.  

– Mii lea ilus go beassat Dielddanuori suohkanii sávvat bures boahtima sámegiela hálddašanguvlui oassin. Šaddá stuorra givrodahkan sámegillii, sámi kultuvrii ja sámi servodahkii márkosámi guovllus. Dat sihkkarastá buoret giellafálaldaga guovllu sámegielagiidda, ja mii áigut mielas lahka ovttasbargat suohkaniin, dadjá sámediggeráđi Mikkel Eskil Mikkelsen (NSR), ovddasvástideaddji gielas.

Eará buorit maid gávdnat Sámedikki reviderejuvvon bušeahtas 2020 leat earret eará:

Sámi viessu Oslos evttohuvvo bissovaš giellaguovddážin, ja aktivitehtadoarjja giellaguovddážiidda lasihuvvo. 

Stipeanda sámi nuoraide geat galget searvat Disney oahpahusprográmmii dáidagis, animašuvnnas, filmmas ja grafihkas. Stipeanda ruhtaduvvo ovttasbarggus eará sámedikkiiguin ja Sámiráđiin ja gokčá mátki Los Angelesii USA:s ja orruma doppe. Sámedikki oassi lea meroštuvvon dahkat kr 60 000.

Buohkat geat ožžot njuolggadoarjaga ožžot 2,4 % haddegoargŋunlasáhusa reviderejuvvon bušeahtas, nu ahte oktiibuot ožžot 3 % lasáhusa 2020:s.  

Sámedikkis lea kr 1 008 000 stuoru vuolláibáza 2019 rájes, maid leat gokčan sámediggeráđi evttohan reviderejuvvon bušeahtas. 

Sámedikki dievasčoahkkin gieđahallá reviderejuvvon bušeahta digitála dievasčoahkkimis geassemánus (vahku 24).

Sámedikki 2020 reviderejuvvon bušeahtta Sámediggeráđi mearrádusárvalus (PDF, 584 kB)

Jus háliidat jearahallat Sámedikki reviderejuvvon bušeahta birra, váldde oktavuođa: Henrik Olsen (NSR), telefon: 90775219