Somby ja Eira virgáibiddjoba direktevravirggiide

Somby ja Eira virgáibiddjoba direktevravirggiide

Liv Inger Somby biddjo fásta virgái Sámedikki gulahallanstába ossodatdirektevran. Sara Inger Lisbeth Mina Eira biddjo fásta virgái Sámedikki bajásšaddan- ja oahpahusossodaga ossodatdirektevran.

Dan mearridii Sámedikki politihkalaš virgáibidjanlávdegoddi čoahkkimis odne.

Liv Inger Somby (58) bargá dál allaskuvlalektorin journalistihkas Sámi allaskuvllas Guovdageainnus. Sus lea guhkes hárjáneapmi mediasuorggis, earret eará NRK Sámis, ja lea bargan mediasuorggis maiddái Ruoššas ja Ruoŧas. Somby lea Duohtavuođa- ja seanadankommišuvnna ja NRK sáddehatráđi lahttu ja jođiha sámi prográmmaráđi, mii árvvoštallá ja evaluere sámi prográmmafálaldaga NRK:s.

Sámediggi lea hui duhtavaš Liv Inger Somby virgáibidjamiin gulahallanstába ossodatdirektevra virgái.

– Su fágalaš duogáš, sámi servodatipmárdus ja hárjáneapmi máŋggajahkásaš journalistan ja mediaovddideaddjin Sámis, lassin su jođiheaddjehárjáneapmái iešguđet dásiin, lei mearrideaddjin válljejupmái. Dán virgáibidjama bokte oažžu Sámediggi čeahpes mielbargi geas leat buorre gelbbolašvuohta fágasuorggis ja dárbbašlaš jođihanhárjáneapmi, dadjá Sámedikki direktevra Inger Marit Eira-Åhrén.

Sara Inger Lisbeth Mina Eira (45) bargá dál Statpedas seniorráđđeaddin. Son lea ovdal bargan earret eará Máze skuvllas oahpaheaddjin ja rektorin. Son lea mánáidgárdeoahpaheaddji, lea váldán lassioahpu, ja sus lea master erenoamášpedagogihkas.

Sámediggi lea maid hui duhtavaš Sara Inger Lisbeth Mina Eira virgáibidjamiin bajásšaddan- ja oahpahusossodaga ossodatdirektevran.

– Su máhttu oahpahussuorggis ja hárjáneapmi mánáidgárdesuorggis ja allaskuvlasuorggis lea leamaš dehálaš Sámediggái virgáibidjanproseassas. Sámediggi oažžu virgáibidjamiin kandidáhta gii dovdá bures ođđa oahppoplána barggu ja oahpponeavvoovddideami, mat leat guovddáš bargosuorggit Sámedikkis. Sávan sutnje buresboahtima Sámediggái ja illudan buori ovttasbargui.

Dan dadjá Mikkel Eskil Mikkelsen, gii lea leamaš doaibmi direktevran bajásšaddan- ja oahpahusossodaga direktevrra virgáibidjamis go direktevra lei inhabiila.

Gulahallanolbmot:
Gulahallanstába direktevrra virgáibidjamis: Inger Marit Eira-Åhrén, mob. 971 29 744, inger.marit.eira-ahren@samediggi.no

Bajásšaddan- ja oahpahusossodaga direktevrra virgáibidjamis: Mikkel Eskil Mikkelsen, mob. 917 42 161, mikkel.eskil.mikkelsen@samediggi.no