Gærjavadtesh smaave maanide

Gærjavadtesh smaave maanide

Lohkh munnjien!-prosjektesne gaajhkh saemien fuelhkieh smaave maanajgujmie reakadamme 2021-23 gærjaveaskoem åadtjoeh healsoegïehtjedimmesne healsoestasjovnesne.

Mijjieh sïjhtebe soptsestallemem healsoestasjovnesne dåarjodh lohkemen, gïeleevtiedimmien jïh gïeleveeljemen bïjre saemien fuelhkide smaave maanajgujmie.

Daennie prosjektesne libie gærjam Riepientjovke bæjhkoehtamme dejtie unnemes maanide. Lissine gærjese libie teekstegærjetjem seamma gærjese bæjhkoehtamme guhkebe teekstine dejtie ånnetji stuerebe maanide.

Fuelhkieh smaave maanajgujmie joe daelie maana voestes jieledejaepien bööresuvvieh sijjen voenges gærjajgujmie åahpenidh jïh saemien gærjah löönedh.

Gåabpegh gærjabæjhkoehtimmieh gærjaveaskosne healsoestasjovnese seedtebe mij maahta gærjaveaskoem dongkedh Saemiedigkien luvnie. Daennie vadtesepaahkesne aaj bïevnesetjaalegh lohkemen jïh gïeleevtiedimmien bïjre. Healsoestasjovne maahta sov utnijh Lohkh munnjien- råajvarimmien bïjre bievnedh daejnie materijelline, jïh gærjaveaskoem saemien maanafuelhkide joekedidh.

Veedtjh vadtesegærjam gærjagåeteste

Doh ånnetji stuerebe maanah vadtesekåarhtem gærjagåatan åadtjoeh gosse 2- jïh 4-jaepiengiehtjedimmesne juktie gærjam veedtjedh jïh sijjen voenges gærjagåetine åahpenidh.

Prosjektesne göökte namhtah gærjah seedtebe gærjagåetide dejnie tjïeltine mah sijhtieh meatan årrodh råajvarimmesne

2-jaepiengïehtjedimmesne maanah gærjam Milli ja Bolfi - Milli jávká - Milli gáhtu//Millie gon Bolfieh - Millie gaarvene.

4-jaepiengiehtjedimmesne maanah gærjam (vaajteles gïelen mietie), Lilli, áddjá ja guovssahas (Lilli, farfar och norrskenet).

Ulmie lea voenges gærjagåetieh laavenjostosne healsoestasjovnine saemien lidteratuvrem jïh gïelem vielie våajnoes jïh gaavnoes darjoeh tjïeltesne. Daan prosjekten tjïrrh Saemiedigkien gærjagåetie bïhkedimmiem jïh dåarjoem vadta gærjagåetide lidteratuvrem skååffedh ovmessie aalteredåehkide jïh lohkemeståantem jallh jeatjah darjomh utnedh gærjagåetesne. Lissine vadtesegærjide gærjagåetieh maehtieh veaskoem dongkedh bïevnesetjaalegigujmie. Bïevnesematerijelle aaj digitaale gååvnese.

Dongkh daesnie

Dovne gærjaveaskoe materijelline jïh gærjah leah namhtah, aaj påastemaaksoeh.

Gærjaveaskoe healsoestasjovnese seedtesåvva jïh gærjah gærjagåatan. Dan åvteste tjoerh mujhtedh påasteadressem tjaeledh gosse dongkh. Mujhtieh aaj dongkemisnie tjaeledh man gellie gærjaveaskoeh jallh gærjah dijjieh sïjhtede jïh mennie saemien gïelesne. Gærjagåetieh tjuerieh lissine tjaeledh man gellie gærjah dejstie göökte joekehts gærjijste dah sijhtieh.

Tjaelieh aaj dongkijen e-påasteadressem jïh tellefovnenommerem.

Gærjaveaskoem jïh/jallh gærjah daesnie dongkh: sambib@samediggi.no