Åarjelsaemien pedagogeles materijelle maanagïertide

Åarjelsaemien pedagogeles materijelle maanagïertide

Saemiedigkieraerie lea 1 540 000 kråvnah Aajegasse, saemien gïele jïh maahtoejarnge, Rørosen tjïeltesne dåårjeme juktie pedagogeles materijellem åarjelsaemien gïelesne evtiedidh. Dah edtjieh åarjelsaemien daajepaahkem evtiedidh man våarome lea gaektsie jaepieboelhkh.

- Dan gaavhtan ahkedh jienebh åarjelsaemien maanah leah maanagïertine, lea vihkele mijjieh dam dåarjoehtibie åarjelsaemien pedagogeles materijelline maanagïertine, Mikkel Eskil Mikkelsen jeahta. Mikkel Eskil Mikkelsen (NSR) 

Dåarjoe vadtasovveme 1. jïh 2. bielieprosjektese, gusnie teema Gïjre jïh gïjregiesie – darjomh mah ektiedimmiem utnieh gïjreboelhkese jïh Giesie jïh tjaktjegiesie – darjomh mah ektiedimmiem utnieh giesieboelhkese. Daajepaahke edtja vuesiehtidh guktie saemieh eatnemem reerieh jïh dam vierhtine nuhtjieh båatsoejaepien tjïrrh.

Learoevierhtie lea teemaj bïjre jïh sæjhta tjeekedh teeksth, tjoejefijlh, guvvieh/illustrasjovnh, filmestuhtjetjh jïh daeverh. Daajepaahke edtja njaalmeldh darjomh jïh gïeleåtnoem eevtjedh. Learoevierhtie lea jienebi faagesuerkiej bïjre mieriesoejkesjisnie jïh ovmessie aaltaridie sjeahta maanagïertesne.

Fåantoe man åvteste ussjedamme daam learoevierhtiem darjodh lea daerpiesvoeth jïh sjaavnjoeh maanagïertijste mah åarjelsaemien gïeline berkieh Rørosesne jïh Snåasesne. Daan biejjien jïjnje pedagogeles materijelle fååtese mij åarjelsaemien gïelese jïh kultuvrese sjeahta.

- Mijjieh tuhtjebe joekoen hijven faagebyjresh jïh maanagïerth åarjelsaemien dajvesne edtjieh ektesne pedagogeles materijellem evtiedidh åarjelsaemien perspektijven mietie, Mikkel Eskil Mikkelsen jeahta.

Prosjekte lea laavenjostoe göökte åarjelsaemien faagebyjresi gaskem, Gïelem nastedh jïh Aajege, gusnie aaj laavenjostoem tseegkeme Suaja maanagïertine jïh Luvlege maanagïertine, goevtese Svaale.

- Lahkoe barkojne, Saemiedigkieraerie lea aavone mijjieh maehtebe daam prosjektem dåarjodh, Mikkelsen minngemes jeahta.

Saemiedigkieraerie vierhtieh prosjektese dåårje dåarjoeöörnegen bijjelen Dåarjoe evtiedæmman pedagogeles materijellese maanagïertide.

Jis gihtjehtimmiem sïjhth gaskesadth Mikkel Eskil Mikkelsen, mob. +47 917 42 161.