Sïjhtebe jienebh leah meatan mïrrestallemebarkosne

Sïjhtebe jienebh leah meatan mïrrestallemebarkosne

Mïrrestalleme tjoeli gaskem lea jïjtjenænnoestimmien, rïektesvoeten jïh seammavyörtegsvoeten bïjre, dovne ektesne jïh oktegh. Nyjsenæjjah jïh ålmah edtjieh seamma reaktah jïh nuepieh utnedh gaajhkine siebriedahkesuerkine. Stoerretjåanghkosne golken saemiedigkieraerie sov mïrrestallemepolitihkeles reektestimmiem buakta tjoelemïrrestallemen bïjre.

BildeKlikkForStorVersjonSaemiedigkieraerien reektestimmie tjoelemïrrestallemen bïjre lea vïjhtede reektestimmie mïrrestallemesuerkesne daan boelhken. Aerpievuekien mietie mïrrestalleme tjoeli gaskem lea dïhte mïsse jeenjesh ussjedieh gosse mïrrestallemen bïjre soptseste, jïh gæmhpoe tjoelemïrrestallemen åvteste lea gellielaakan baalkam ööleme dejtie jeatjah barkoesuerkide mïrrestallemesuerkesne, goh mïrrestalleme saemide funksjovnegiehpiedimmine, LHBTIQ-almetjh, vædtsoesvoetedåeriesmoere Saepmesne jïh gæmhpoe aassjoelahtestimmiej vööste. Daah sjïere barkoesuerkieh våaromem biejieh akten orre mïrrestallemebïevnesasse maam Saemiedigkie edtja mænngan daan boelhken gïetedidh. 

– Tjoelemïrrestalleme annje joekoen sjyöhtehke teema gelline siebriedahkesuerkine. Dej minngemes jaepiej dotkeme stoerre joekehtsh tjoeli gaskem vuesehte vihkeles suerkiej sisnjeli saemien siebriedahkesne, saemiedigkiepresidente Aili Keskitalo (NSR) jeahta.

Ööhpehtimmien sisnjelen daejrebe jienebh saemien ålmah nyjsenæjjijste jåarhkelïerehtimmeste haajpanieh, jïh geervebe nyjsenæjjide baahtsemem åadtjodh vuesiehtimmien gaavhtan aalkoejieliemidie. Saemiedigkieraerie sæjhta gåabpegh tjoelh edtjieh seamma nuepieh utnedh.

Gaajhkh tjoelh edtjieh tjïelke barkoenuepieh jïh nuepieh aerpievuekien daajroem saemien jielemi sisnjeli jåerhkedh. Juktie nænnoes saemien jielemem utnedh dellie daerpies aktem vielie joekehtadteme barkoemaarhkedem sjugniedidh stuerebe gamtojne ovmessie såarhts gïehtelimmine, jïh barkoejielede stuerebe balaansine tjoeli gaskem.  

– Daan beajjetje jieliemisnie aktem jarkemem vuejnebe gusnie nyjsenæjjaj råålla ånnetji ånnetji veaksahkåbpoe sjædta. Jienebh nyjsenæjjah barkoejgujmie nierhkieh mejgujmie aerpievuekien mietie ålmaj barkoeh orreme, jïh nyjsenæjjaj baajnehtimmiefaamoe aalkoejielieminie veaksahkåbpoe sjædta, Keskitalo vihteste.

Læjhkan jïjnje aajmene juktie nyjsenæjjaj baajnehtimmiefaamoem jïh sijjiem aerpievuekien ålmabarkojne nænnoestidh. Tjoeleråållah saemien siebriedahkesne gååvnesieh mah eah leah åssjaldahken mietie tjïelke mïrrestallemen bïjre. Saemiedigkie sæjhta lissiehtamme dotkemasse jïh statistihkese mïrrestallemesuerkesne sjïehteladtedh.

– Aerpievuekien mietie lea tjoelemïrrestallemem åtneme goh nyjsenæjja-aamhtese, jïh gelline suerkine annje numhtie, saemiedigkiepresidente Keskitalo vihteste, men saemiedigkieraerie sæjhta jienebh sijhtieh meatan årrodh mïrrestallemebarkosne.

– Mijjieh vuejnebe vihkeles dovne nyjsenæjjah jïh ålmah leah meatan digkiedimmesne, jïh sïjhtebe Saemiedigkie edtja hijven vuesiehtimmine åvtene vaedtsedh gosse lea mïrrestallemen bïjre, presidente minngemes jeahta.