Girjeskeaŋkkažat mánáide

Girjeskeaŋkkažat mánáide

Loga munnje!-prošeavttas ožžot buot sámi smávvamánnábearrašat, geain lea unnamánáš riegádan áigodagas 2021-23, girjelávkkaža go fitnet dearvvašvuođastašuvnnas dearvvašvuođadárkkistusas.

Mii háliidit doarjut ságastallama dearvvašvuođastašuvnnas lohkama, giellaovdáneami ja giellaválljema birra sámi smávvamánnabearrašiidda.

Smávvamánnabearrašat bovdejuvvojit juo dál máná vuosttaš jagis oahpásnuvvat iežaset báikkálaš girjerádjosiin luoikkahan dihte sámi girjjiid.

Dán prošeavttas leat mii almmuhan girjji Riebančivga sámegiel teavsttain unnimusaide. Lassin girjái leat mii almmuhan teakstagirjjáža seamma girjái mas lea veahá guhkit teaksta daidda stuorát mánáide.

Goappešat almmuhemiid sáddet mii girjeveaskku mielde dearvvašvuođastašuvnnaide, mat sáhttet diŋgot girjeveaskku Sámedikkis. Dán skeaŋkapáhkas leat maiddái diehtojuohkingihpagat lohkama ja giellaovdáneami birra. Dearvvašvuođastašuvdna sáhttá addit dieđuid olbmuide Loga munnje-doaimma birra dáid materiálaid bokte ja juohkit girjeveaskku sámi mánnabearrašiidda.

Oaččo girjji skeaŋkan girjerádjosis

Stuoribuš mánát ožžot 2- ja 4-jagidárkkistusas skeaŋkakoarttaža girjerádjosii gos sáhttet viežžat girjji ja oahpásmuvvat báikkálaš girjerádjosii.

Prošeavttas sáddet mii guokte girjji nuvttá girjerádjosiidda dain suohkaniin/gielddain mat háliidit leat mielde doaimmas. 

2-jagidárkkistusas ožžot mánát girjji Milli ja Bolfi - Milli jávká - Milli gáhtu//Millie gon Bolfieh - Millie gaarvene

4-jagidárkkistusas ožžot mánát girjji Lilli, áddjá ja guovsagis.

Mihttu lea ahte báikkálaš girjerádjosat ovttas dearvvašvuođastašuvnnain ožžot sámi girjjálašvuođa ja sámegielaid eanet oidnosii ja olamuddui suohkanis/gielddas. Dán prošeavtta bokte fállá Sámedikki girjerájus bagadallama ja doarjaga girjerádjosiidda háhkat girjjálašvuođa iešguđet ahkejoavkkuide ja doallat lohkanbottožiid dahje eará doaimmaid girjerádjosis. Lassin skeaŋkagirjjiide sáhttet girjerádjosa diŋgot veaskku mas leat diehtojuohkingihppagat. Diehtojuohkinmateriála olamuttos maiddái digitálalaččat.

Diŋgo ná

Sihke girjeveaskku materiálaiguin ja girjjit leat nuvttá, maiddái sáddengolut. 

Girjeveasku sáddejuvvo njuolga dearvvašvuođastašuvdnii ja girjjit njuolga girjerádjosii. Danne fertet muitit diŋgojupmái čállit poastačujuhusa. Muitte čállit maid man galle girjeveaskku dahje girjji áigubehtet ja makkár sámegillii. Girjerádjosat fertejit dasa lassin čállit galle girjji goappáge girjjis háliidit.

Čále muđui oktavuođadieđuid eboastačujuhusain ja telefonnummariin.

Diŋgojumit sáddejuvvojit deike: sambib@samediggi.no