Voice of Norway ehpan gulá ienep Sámedikke duogátja birra, duola dagu manen la ásaduvvam. Gulá aj Sámedikke dåjmaj birra sihke nasjåvnålasj ja rijkajgasskasasj dásen, ja li aj diedo Sámedikke arkitektuvra ja dájddatjoakkáldagá birra. Subtsastip oasátjijt aj sáme histåvrås ja kultuvras, ja gulldaliddje bessi aj Sámedikke tjáppa juojgav gulldalit.

Jiednaoahpestibme la sajenis gájkajda ehpa baktu man namma l Voice of Norway. Ulmutja gudi Kárásjjågåv guossidi máhtti Sámedikke ruvtov viedtjat (jiednabálggáv) ehpas. Gå lip Sámedikke ålggolin, de subtsastahtjá æhppa automatihkalattjat dajt iesjguhtik jiednasubttsasijt maŋenagi gå Sámedikke birra váttsasj. Fálaldahka l dálla dárogiellaj ja ieŋŋilsgiellaj, valla ájggomus la vijdedit maŋŋela sámegielajda aj.

– Sávvap gájkajt buorisboahtem oahpástuvvat Sámedikkijn ehpa baktu. Dát fálaldahka l ájnas aj ålggorijkalattjajda gudi sihti oahppat ienep Sámedikke birra, javllá dievastjåhkanimjådediddje Tom Sottinen.

Æhppa fálaldahka l nåvku, ij la ietjá gå dav viedtjat. Dáv oahpestimev máhtá ietjat ájgeadnemav milta adnet, váttsatjit telefåvnåjn tjuokkas tjuoggaj.

Svea Vikander la ieŋŋilsgielak subtsastiddje. Lisa Marie Kristensen la dárogielak subtsastiddje ja GLR, Nils Martin Kristensena, la báddim ja jiednasubttsasijt buvtadam.

Náv barga:

Ietjat telefåvnån viettja ehpav Voice of Norway. Åtså dåppe Sámedikkev ja viettja ruvtov. Gå la ruvtov viedtjam, de máhtá mobijllanehtav jáddit ja ruvtov tjuovvot tjuokkaj milta. Jus la ietjá bájken, de máhtá aj dáv ehpav adnet gå Sámedikkev åtså. Dieddelit tjuokkajt majt sihtá dan ruvton gullat.

Diehti gus jut Sámedigge l aj dahkam digitála oahpestimev sámediggehuodnahis? Dav dáppe gávna.