Media lea okta servodaga geađgejulggiin. Friddja ja sorjjasmeahttun redaktevrastivrejuvvon mediain lea guovddáš rolla demokratiijas, go dat fuolahit cealkinfriddjavuođa, preassafriddjavuođa ja diehtojuohkinfriddjavuođa. Dát árvvut eai leat diehttelasat juohke sajis máilmmis, ja dat dávjá hástaluvvojit. Media leat dehálaš čanastat olbmo ja servodaga gaskkas, ja das lea dehálaš servodatdoaibma ovddidit áššiid, ja váikkuhit ja loktet ovdan kritihkalaš gažaldagaid eiseválddiide ja servodahkii muđui.
Mediamáŋggabealatvuohta lea eaktu cealkinfriddjavuhtii ja demokratiijai. Mediain lea stuora ovddasvástádus muitalit olbmuide mii servodagas dáhpáhuvvá sihke báikkálaččat ja máilmmiviidosaččat. Redaktevrastivrejuvvon mediain lea ovddasvástádus almmolaš dieđuid juohkimis, heahtediliid dustemis, demokráhtalaš proseassaide ja sosiála oktavuhtii. Mediat leat dehálaš arenat almmolaš ságastallamiidda. Dat leat mielde váikkuheame makkár áššit ovddiduvvojit ja leat mielde hábmeme min servodatipmárdusa. Dat leat maiddái dehálaččat gielladikšumii ja giellaovddideapmái.
Sámediggedieđáhus sámi mediaid birra
Sámediggeráđi Beaiveálgu-julggaštusa mielde lea ráhkaduvvon sámediggedieđáhus sámi mediaid birra, meannuduvvon ja mearriduvvon dievasčoahkkimis jagi 2023. Sámediggedieđáhus DJÏREGUEDTJIE ovdánbuktá Sámedikki mediapolitihka mihttomeriid ja strategiijaid. Sámediggái lea dehálaš ahte mediat berrejit čájehit dan sámi girjáivuođa mii gávdno sámi servodagas ja daid iešguđet sámi gielaid, maiddái ubmi-, bihttán- ja nuortalašgielaid ektui, ja ahte sámi álbmogis lea nana ja sorjjasmeahttun sámi mediagirjáivuohta.
Loga: DÏJREGUEDTIJE - Sámediggedieđáhus sámi mediaid birra (PDF, 3 MB)
Sámedikki njuolggodoarjjaortnet sámi mediaide
Sámediggi juolluda njuolggodoarjaga gávcci iešguđetge publikašuvdnii ja mediaaktevrii. Dat leat iešguđetge ládje ja iešguđetge geavahanvuogádaga bokte mielde ovddideame sámegiela, sámi dáidaga ja kultuvrra iešguđetlágán olahusjoavkkuide ja ahkejoavkkuide.
Doarjjaortnega ulbmil lea doarjut mediaid mat áŋgiruššet servodaga. Sámediggái lea dehálaš ahte sámi giella, dáidda ja kultuvra leat olámuttos iešguđet mediain ja vuođđovuogádagain, ja ahte buvttadeamis ja gaskkusteamis lea buorre kvalitehta.