Ole Larsen ja Susanna Olsdatter Matti ja sunnu gáktsa máná årrun dánna jages 1804 gitta 1826 jahkáj. Ridovádá diehti jåhtin Giebarådos (norm. Geabarohtu) Evenesmarkkuj

Ole ja Berit

Ole Jakobsen Nibla lij ællosábme Girjjásis Váhtjerin. Vállduj árbbátjijn Berit Maria Knutsdatterijn ja årrujga dási jagen 1847. Oattjojga bárnev Larsav (1844-1928). Larssa vállduj vuostak Elen Pedersdatterijn ja vas maŋŋela Elen Olofsdatter Pingijn. Dåssju guovtes sunnu mánájs, Anders ja Anna, bajássjattajga. Æjgáda ja Elena oabbá aktan familjajn årrun Lallegoaden.

Sárnnediddje

Ole Jakobsen ja bárnnes Lárssa lijga goappátja sárnnediddje. Larsan lij stuor gábmá guokta lanjáj ja aneduváj skåvllådåhpen ja biednagoahten læstadiánarijda. Bieddnidattijn lij gábmá ållu dievva ulmutjijs. Álu båhtin ulmutja båndorsijdajs merragátten.  

Gábmá lij vilá ájmon gitta 1936 jahkáj åvddål láblaj. Ij dasti vuojnnu, valla gábmá l dánna akti ájgenis tjuodtjum. 

Lárssa lij sárnnediddje, ja lågodibmen sjaddá galla tjåhkalvisá lidjin Lars Olsa ja Elena sijdan. Ednagav jubmelabágos la lågåduvvam ja håladuvvam dan goaden, ja madin dán dajvva nanna tjuodtjop, gullu vilá dagu tjuodtjop ájlis ednama nanna.
John Mikal Løvli (1898 – 1996)