Oainnus la nuorttasámegiela báhko mij merkaj vuojnos, ja dássta besa várddahit stuorra oasev Duorga duobddágis. Gábmásaje dánna vuoset bátsidisájt goahtegámás ja fieksegámás. Alemus dájs la goahtegábmá.

Jáhkedahtte lijga Nils Henrik Andersen (1807-1848) Gullsteinas aktan suv áhkátjijn Berit Henriksdatter Pingi (1805-1854) gudi dási årrujga. 

Nilsa ja Berita máná

Nilssa ja Berit oattjojga guhtta máná, dåssju John Mikal Nilsen (1847-1914) bajássjattaj.

 John Mikal lij gietjav jagák gå ieddnes jámij. Árvvedahtte jådij sån Lánttedievváj gånnå guovtes suv æddnujs jali tjietjijs årojga

 John Mikalla vállduj vuostak Sigrid Birgitte Henriksdatterijn (1854-1879) ja jådijga Sáttojvuobmáj (norm. Sáttidvuopmi). Sån vállduj maŋŋela Karen Anna Johnsdatterijn (1857). Gállasjguojmitja jådijga Vielggisvárráj (norm. Vilgesvárri), ja sjattajga vuostasj ednamlájggijiddjen danna. 1900-lågå álgon famillja jådij vas Vassbakkenij Sáttojvuomen.

Dimbarskåvllå Oainnusin

Henrik Henriksenan (1832-1902) ja bárnenis Olaus Henriksenan (1868-1956) lij dimbarskåvllå Oainnusin. Såj skåvllijga ietjasa oahppijt dimbarjallama rájes, gåktu tjåskåjt hábbmidit, gitta dimbardibmáj ja goahtetsieggimij. Dåjmadahka stuoroj dasik divna biehtsevuovdde Duorgan tjuoladuváj materiállan.