Rudá li dálla juogeduvvam gålmå prosjevtajda sierra åhtsåmvuoro maŋŋela. Guokta prosjevta gulluji Nordvika sijddaj Bådådjo suohkanin. Dát la bihtámsáme sijdda gånnå li automatihkalattjat suodjaluvvam huodnaha Valnesvatnet jávrgátten. 

Åvddål la Sámedigge oassálasstám ájmmuj åttjudittjat årromgoadev. Dálla l ládo ja ednamtjieller ma galggi divoduvvat, ja tjoahkkáj juolloduvvá 340 000 kråvnå dán guovte prosjevtajda. Dán sijdan e åro ulmutja, valla la ráddnasiebrre bájkkáj. Sijdda la tjáppa duobddágijn Valnesvatnet jávrgátten, ja álkke l bessat dåhku ulmutjijda. 

– La riek buorre gå ráddnasiebrre dahká dáv ájnas bargov. Sij bisodi huodnahijt ma vuorjjás kultuvrrabirrasij gulli, ja lav ávon gå máhttep dáv doarjjot, javllá sámedikkeráde Runar Myrnes Balto (NSR).

Goalmát juollodibme manná Bihtámsáme musiedjaj ja prosjæktaj Bihtámsáme jiena - bihtámsáme tsieggimárbbe, mij oadtju 160 000 kråvnå. Árbbediedo suodjalibmáj, tjoahkkim ja gaskostibme li prosjevta oajvvetsakke.

– Árbbediehto ja giehtabarggomáhtudahka l dárbulasj jus luluj bihtámsáme tsieggimárbev bisodit. Danen la riek ájnas jut dagáduvvi ariená dán máhtudagá gaskostibmáj ja vijddásap jårkadibmáj, javllá sámedikkeráde Myrnes Balto