Prosjevta ulmme l  lågenanguokta girje almodit oarjjelsámegiellaj åvddål jage 2025 låhpa. Oajvveulmmejuogos li stuoráp máná ja nuora – sidjij ij dálla gávnnu edna oarjjelsámegiela girjálasjvuohta. Prosjevtan ájnnasit dættodi girjijt ma dan áldarjuohkusij hiehpi, ja girjijt maj vuodon máhttá videogirjijt dahkat.

– Dárbahip ienebut miellagiddis ja iesjguhtiklágásj girjijt oarjjelsámegiellaj – ájnnasit stuoráp mánájda ja nuorajda. Gå l vijddásap girjálasjvuodafálaldahka, de nuora bessi ienep iesjguhtiklágásj girjijt låhkåt ja oadtju ådå låhkåmvásádusájt ietjasa giellaj. Dat buoret låhkåmmielav, gielladåbdov ja kultuvralasj tjanástimev. Gå girjálasjvuohta l sadjihin, de la álkkep hållat ja oahppat oarjjelsámegielav, javllá sámedikkeráde Ole-Henrik Bjørkmo Lifjell.

Fylkagirjjevuorkká, Trööndelagen fylhkengøragåetie, la måttijt jagijt læhkám ájnas sáme girjálasjvuoda almodime hárráj. Sij li girjijt jårggålam oarjjelsámegiellaj, valla aj viehkedam jårggålit girjijt bihtám-, julev-, nuortta-, gålldå- ja ubbmemsámegiellaj. Dasi lassen dat la  ienebujda dahkam vejulattjan bargatjit jårggåliddjen, gå li bálkkim sihke ådå ja hárjjánam jårggåliddjijt, ja dat aj la lasedam máhtudagáv gå hárjjánam jårggåliddje li bagádallam ådå jårggåliddjijt maŋenagi.

Mávsulasj giellaåvddånibmáj ja oahppamij

Aj sámedikkeráde Maren Benedicte Nystad Storslett, gænna l åvdåsvásstádus duola dagu gielas ja åhpadusás, dættot man mávsulasj prosjækta l giela nannima ja oahppama hárráj.

– Vaj gielav máhttá oahppat ja hållat, ja vaj dat la luondulasj oasse iellemis, de hæhttuji gávnnut girje ja sisadno ma hiehpi mánáj ja nuoraj berustimijda. Trööndelagen fylhkengøragåetie barggo la riek ájnas vaj oarjjelsámegiellaj girjálasjvuohta l sadjihin ulmutjijda. Dan diehti giella åvddån, dat nanni mánáj ja nuora bæjválasj giella aktijvuodav. Videogirjijt li riek ájnnasa moaddásijda, ja da buoragit doajmmi doarjjan giellaåhpadusán, javllá Storslett.

Doarjja juolloduvvá doarjjaårdnigin Prosjæktadoarjja sáme girjálasjvuohtaj baktu.

Prosjevta birra máhttá ienebut låhkåt Trööndelagen fylhkengøragåetie (Trøndelag fylkesbibliotek) næhttabielen