Ådåásadum julevsáme mánájgárdde Viejega AS oadtju 500 000 kråvnå doarjjan Sámedikkeráde la dán vahko juollodam 500 000 kråvnå ådå julevsáme mánájgárddáj Viejega as Hábmerin. Rudá galggi aneduvvat álgadibmáj ådå mánájgárddefálaldagáv nav vaj julevsámemáná vas oadtju sámegielak mánájgárddefálaldagáv. 16 julevsámemáná ælla adnám sámegielak mánájgárddefálaldagáv dat rájes gå ájnna julevsámegielak mánágárdde konkurssi ja stieggi biehtsemáno maŋemus biejvijt. Máná li dat rájes læhkám sáme mánájgárddefálaldagá dagi. Silje Karine Muotka Árvu/Sametinget - La stuor dárbbo vat julevsámegielak mánájgárddefálaldagáv rahpat. La ájnnasamos giella viessoma hárráj guovlon jut máná oadtju fálaldagáv ietjas giellaj, ja jut la mánájgárddefálaldak mij la vuododuvvam sáme kultuvran, javllá sámedikkepresidænnta Silje Karine Muotka (NSR). Viejega AS oadtjoj dåhkkidimev ragátmáno Hábmera suohkanis rabátjit ådå mánájgárdev Ájluovtan. Duodden oadtju Viejega AS, dagu gájk ietjá sáme mánájgárde, dårjav 90 000 kr Sámedikkes doarjjaårdniga sáme mánájgárde ja åssudagá baktu. Dá rudá máhtti aneduvvat mánájgárddefálaldagá organiserimij mij la vuododuvvam sáme giellaj ja kultuvrraj, ja ma juolloduvvi sáme mánájgárdijda ja sáme åssudagájda jahkásattjat. ArtikkelPublisertDatoFront 10.10.2022 08.16 SistEndret 30.08.2024 10.49